មន្ត្រីអេហ្ស៊ីបម្នាក់ បានប្រាប់សារព័ត៌មានស៊ីនហួកាលពីថ្ងៃចន្ទថា ប្រទេសអេហ្ស៊ីប បានបង្កើនការត្រៀមលក្ខណៈរបស់ខ្លួនសម្រាប់ការបើកច្រកព្រំដែន Rafah ឡើងវិញ នៅក្នុងការរំពឹងទុកនៃកិច្ចព្រមព្រៀងបទឈប់បាញ់ដ៏មានសក្តានុពលរវាងអ៊ីស្រាអែល និងក្រុមហាម៉ាស ខណៈដែលការចរចា បង្ហាញសញ្ញានៃរីកចម្រើនទៅមុខ។

មន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះ បានអះអាងថា អាជ្ញាធរបានបង្កើនការត្រៀមខ្លួន នៅគ្រប់នាយកដ្ឋានទាំងអស់ នៅច្រកឆ្លងកាត់ Rafah រួមទាំងផ្នែកសន្តិសុខ រដ្ឋបាល លិខិតឆ្លងដែន សុខភាព និងអង្គភាពដាក់ឲ្យនៅដាច់ពីគេ ដើម្បីធានាបាននូវចលនាភ្លាមៗរបស់ប៉ាឡេស្ទីន នៅពេលដែលច្រកឆ្លងកាត់នេះ ត្រូវបានបើកឡើងវិញ។

ប្រភពដដែលបានបន្ថែមថា៖«នាយកដ្ឋានចាំបាច់ទាំងអស់ នៅតែប្រតិបត្តិការនៅច្រកឆ្លងកាត់ Rafah ទោះបីជាក្នុងអំឡុងពេលបិទក៏ដោយ» ដោយសង្កត់ធ្ងន់ថា ភាគីអេហ្ស៊ីប ត្រូវបានបំពាក់សម្ភារៈនិងសមត្ថភាពគ្រប់គ្រាន់ ដើម្បីដោះស្រាយស្ថានការណ៍នេះ។

មន្ត្រីម្នាក់មកពីអង្គការអឌ្ឍចន្ទក្រហមអេហ្ស៊ីប បាននិយាយថា ជំនួយមនុស្សធម៌ ដែលស្តុកទុកនៅជិតច្រកឆ្លងកាត់នេះ គឺត្រៀមខ្លួនជាស្រេចសម្រាប់ការបញ្ជូនភ្លាមៗ ទៅកាន់តំបន់ហ្កាហ្សា នៅពេលដែលច្រក Rafah បើកដំណើរការឡើងវិញ។ លោកបានកត់សម្គាល់ថា រថយន្តជំនួយពី ៤០ ទៅ ៥០គ្រឿង រួមទាំងប្រេងឥន្ធនៈ បច្ចុប្បន្ន ត្រូវបានដឹកជញ្ជូនជារៀងរាល់ថ្ងៃ ទៅកាន់ច្រក Kerem Shalom នៅខាងអ៊ីស្រា អែល ដោយមានការគាំទ្រពីបណ្តាទីភ្នាក់ងារអង្គការសហប្រជាជាតិ។