អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បាននិយាយកាលពីថ្ងៃចន្ទថា ទំនាក់ទំនងនាពេលអនាគតរបស់អ៊ីរ៉ង់ជាមួយស៊ីរី ពឹងផ្អែកលើសកម្មភាពរបស់ប្រទេសនេះ។

លោកបានធ្វើការអត្ថាធិប្បាយ នៅក្នុងសន្និសីទសារព័ត៌មានប្រចាំសប្តាហ៍ នៅក្នុងរដ្ឋធានីតេអេរ៉ង់ ខណៈពេលដែលលោកបានលើកឡើងពីការវិវឌ្ឍចុងក្រោយនៅក្នុងប្រទេសស៊ីរី និងលទ្ធភាពនៃការបន្តទំនាក់ទំនងឡើងវិញ ជាមួយទីក្រុងដាម៉ាស(Damascus)។

លោក Baghaei បានរំលឹកឡើងវិញនូវជំហររបស់អ៊ីរ៉ង់ថា ប្រជាជនស៊ីរី គួរតែត្រូវបានអនុញ្ញាតឲ្យកំណត់ជោគវាសនារបស់ពួកគេ ដោយមិនមាន «ការជ្រៀតជ្រែក» ពីបរទេសណាមួយឡើយ។ លោកបានបន្ថែមថា អ៊ីរ៉ង់យកចិត្តទុកដាក់យ៉ាងខ្លាំងចំពោះអធិបតេយ្យភាពជាតិនិងបូរណភាពទឹកដីរបស់ប្រទេសស៊ីរី ដែលតំបន់អាស៊ីខាងលិច គួរតែប្រឹងប្រែងដើម្បីសម្រេចឲ្យបាននូវការគោរព។

លោក Baghaei បាននិយាយថា អ៊ីរ៉ង់គាំទ្រដំណើរការណាមួយ ដែលនឹងរួមចំណែកដល់ការផ្លាស់ប្តូរប្រកបដោយសុវត្ថិភាព និងមានការការពារ នៅក្នុងប្រទេសស៊ីរី និងទប់ស្កាត់ការរំលោភលើអធិបតេយ្យភាពជាតិ និងបូរណភាពទឹកដីរបស់រដ្ឋ។

សម្ព័ន្ធភាពសកម្មប្រយុទ្ធស៊ីរីដឹកនាំដោយក្រុម Hayat Tahrir al-Sham បានផ្តួលរំលំរដ្ឋាភិបាលអតីតប្រធានាធិបតី លោក បាសា អាល់អាសាដ (Bashar al-Assad) កាលពីថ្ងៃទី ០៨ ខែធ្នូ ឆ្នាំ ២០២៤។ ក្រុមសកម្មប្រយុទ្ធនេះ ក៏បានសម្រុកចូលស្ថានទូតអ៊ីរ៉ង់ នៅទីក្រុងដាម៉ាស ដែលត្រូវបានទុកចោលមុនពេលការវាយប្រហារ។ អ៊ីរ៉ង់ជាសម្ព័ន្ធមិត្តដ៏រឹងមាំរបស់រដ្ឋាភិបាលលោក អាល់អាសាដ ជាយូរមកហើយក្នុងតំបន់។