អភិបាលរដ្ឋ California របស់សហរដ្ឋអាមេរិក គឺលោក Gavin Newsom ចង់ឲ្យសមាជិកសភារបស់រដ្ឋអនុម័តថវិកាចំនួន ២,៥ពាន់លានដុល្លារ ដើម្បីគាំទ្រដល់កិច្ចប្រឹងប្រែងឆ្លើយតបគ្រាអាសន្ន និងជួយផ្តល់មូលនិធិដល់ផែនការសង្គ្រោះដ៏ធំ បន្ទាប់ពីមានចំហេះព្រៃដ៏បំផ្លិចបំផ្លាញ នៅក្នុងទីក្រុង Los Angeles។

សំណើដែលនឹងត្រូវការការអនុម័តពីសភារបស់រដ្ឋនេះ ដែលគ្រប់គ្រងដោយសមាជិករបស់គណប្សប្រជាធិបតេយ្យ រួមមានជំនួយសង្គ្រោះបន្ទាន់ចំនួន ១ពាន់លានដុល្លារ និង ១,៥ពាន់លានដុល្លារផ្សេងទៀតសម្រាប់ការស្ដារឡើងវិញ និងការត្រៀមទប់ទល់ចំហេះព្រៃ។ អគ្គិភ័យនេះបានសម្លាប់មនុស្សយ៉ាងតិច ២៤នាក់ និងបំផ្លាញផ្ទះសម្បែងរាប់ពាន់ខ្នង។

តាមរយៈសេចក្តីថ្លែងការណ៍ លោក Newsom បានប្រាប់ឲ្យដឹងថា៖ «រដ្ឋ California កំពុងរៀបចំផែនការដ៏ធំ (Marshall Plan) ដើម្បីជួយទីក្រុង Los Angeles ងើបឡើងវិញឲ្យបានលឿន និងល្អប្រសើរជាងមុន ដោយរួមមានទាំងថវិកាថ្មីរាប់ពាន់លាន និងពន្លឿនដល់ការផ្ដល់មូលនិធិរបស់រដ្ឋ ដើម្បីឲ្យយើងអាចធ្វើការងារលឿនជាងមុន ក្នុងការចែកចាយ សម្រាប់មនុស្សរាប់ពាន់នាក់ដែលបានបាត់បង់ទាំងផ្ទះសម្បែង និងជីវភាពរស់នៅរបស់ពួកគេ ដោយសារព្យុះអគ្គិភ័យទាំងនេះ។ សូមប្រជាជនគ្រប់រូបនៃទីក្រុង Los Angeles ដឹងថា យើងនៅទីនេះ ដើម្បីជួយដល់អ្នកទាំងអស់គ្នា»។

លោក Newsom កំពុងស្វែងរកការបង្កើនជំនួយ ខណៈដែលរដ្ឋ California រំពឹងថា នឹងមានអតិរេកថវិកាស្ដួចស្ដើង ដោយមានថវិកាតិចតួចណាស់ សម្រាប់ការចំណាយបន្ថែម។ ការិយាល័យរបស់លោក Newsom បាននិយាយថា មូលនិធិចំនួន ១ពាន់លានដុល្លារ នឹងត្រូវសងវិញដោយទីភ្នាក់ងារគ្រប់គ្រងគ្រាអាសន្នសហព័ន្ធ។

ប្រធានាធិបតីជាប់ឆ្នោតលោក Donald Trump បានរិះគន់ការឆ្លើយតបគ្រោះមហន្តរាយរបស់មន្ត្រី នៅទីក្រុង Los Angeles និងរដ្ឋ California ហើយលោក Newsom បានលើកឡើងពីការព្រួយបារម្ភ ដែលថា រដ្ឋបាលនាពេលខាងមុខ នឹងព្យាយាមរារាំងជំនួយ៕