វិមានក្រឹមឡាំង កាលពីថ្ងៃចន្ទ (ទី១៣ ខែមករា) បានចោទប្រកាន់អ៊ុយក្រែនថា បានធ្វើ «ភេរវកម្មថាមពល» និងបង្កគ្រោះថ្នាក់ដល់សន្តិសុខថាមពលរបស់អឺរ៉ុប បន្ទាប់ពីមានការប៉ុនប៉ងវាយប្រហារដោយយានដ្រូនលើផ្នែកនៃបំពង់បង្ហូរឧស្ម័នដ៏សំខាន់ដែលបញ្ជូនការផ្គត់ផ្គង់របស់រុស្ស៊ីទៅទួរគី។

ការចោទប្រកាន់ដែលទីក្រុងគីវមិនបានធ្វើអត្ថាធិប្បាយដល់នោះ កើតឡើងចំពេលមានជម្លោះថាមពលកាន់តែខ្លាំងឡើងៗ រវាងប្រទេសទាំង២ ដោយមានរយៈពេលជិត ៣ឆ្នាំបន្ទាប់ពីរុស្ស៊ីបានបើកការវាយលុកផ្នែកយោធាទ្រង់ទ្រាយធំរបស់ខ្លួន។

ទីក្រុងគីវ បានបញ្ឈប់ការបញ្ជូនឆ្លងកាត់នូវឧស្ម័នរុស្ស៊ីទៅកាន់ប្រទេសទី៣ តាមរយៈអ៊ុយក្រែន កាលពីថ្ងៃទី០១ ខែមករា ពោលគឺបានបញ្ចប់កិច្ចសហប្រតិបត្តិការថាមពលជាច្រើនទសវត្សរ៍ដែលបានបង្កើតប្រាក់ចំណូលរាប់ពាន់លានដុល្លារដល់ប្រទេសទាំង២ ដោយការសម្រេចនេះត្រូវបានធ្វើឡើងក្នុងគោលបំណងកាត់បន្ថយប្រាក់ចំណូល សម្រាប់កងទ័ពរបស់ទីក្រុងមូស្គូ។ 

ហើយកាលពីសប្តាហ៍មុន សហរដ្ឋអាមេរិកបានបន្ថែមទណ្ឌកម្មថ្មីលើវិស័យប្រេងរបស់រុស្ស៊ី ដែលជាការផ្ដល់ផលប៉ះពាល់ដ៏ធ្ងន់ធ្ងរមួយផ្សេងទៀតដល់ឧស្សាហកម្មអ៊ីដ្រូកាបូនដ៏សំខាន់របស់ទីក្រុងមូស្គូ។

ក្រសួងការពារជាតិរុស្ស៊ី បានឲ្យដឹងកាលពីថ្ងៃទី១៣ ខែមករាថា អ៊ុយក្រែនបានបាញ់យានដ្រូនវាយប្រហារចំនួន ៩គ្រឿង កាលពីថ្ងៃទី១១ ខែមករា ដាក់ស្ថានីយ៍បង្ហាប់ឧស្ម័ន នៅក្នុងភូមិ Gai-Kodzor ដែលមានទីតាំងនៅក្បែរតំបន់ឆ្នេរភាគខាងត្បូងនៃប្រទេសរុស្ស៊ី នៅសមុទ្រខ្មៅ។

ទីក្រុងមូស្គូបានប្រាប់ថា រោងចក្រនេះ គឺជាផ្នែកនៃបំពង់បង្ហូរ TurkStream ហើយបានចោទប្រកាន់អ៊ុយក្រែនថា បានព្យាយាម «កាត់ផ្តាច់ការផ្គត់ផ្គង់ឧស្ម័នដល់បណ្តាប្រទេសអឺរ៉ុប»។ ក្រសួងការពារជាតិបានបញ្ជាក់ថា យានដ្រូនទាំងអស់ត្រូវបានបាញ់ទម្លាក់ ប៉ុន្តែមាន «ការខូចខាតតិចតួច» ដោយសារការធ្លាក់កម្ទេចកម្ទី។ ការចែកចាយឧស្ម័នមិនរងផលប៉ះពាល់នោះទេ។ 

ទីភ្នាក់ងារសារព័ត៌មានរដ្ឋរុស្ស៊ី បានរាយការណ៍ថា អ្នកនាំពាក្យវិមានក្រឹមឡាំង លោក Dmitry Peskov បានហៅការវាយប្រហារនេះថា ជា «ការបន្តនៃបណ្តាញភេរវកម្មថាមពលដែលទីក្រុងគីវ បាន និងកំពុងបន្តធ្វើ ក្រោមការណែនាំបង្ហាញផ្លូវពីមិត្តភ័ក្តិក្រៅប្រទេសរបស់ប្រទេសនេះ អស់រយៈពេលជាយូរមកហើយ»៕