រដ្ឋអាជ្ញាពិសេសរបស់សហរដ្ឋអាមេរិកដែលបានកាត់ទោសកូនប្រុសរបស់លោក Joe Biden ខាងគណបក្សប្រជាធិបតេយ្យ គឺលោក Hunter Biden បានហៅការរិះគន់របស់លោកប្រធានាធិបតីចំពោះករណីនេះថា មិនសមហេតុផល និងខុសឆ្គង នៅក្នុងរបាយការណ៍ចុងក្រោយ ស្តីពីការស៊ើបអង្កេតរបស់លោក ដែលបានចេញផ្សាយ កាលពីថ្ងៃចន្ទ (ទី១៣ ខែមករា)។

រដ្ឋអាជ្ញាពិសេសលោក David Weiss បានលើកយកមកនូវសំណុំរឿងប្រឆាំងនឹងលោក Hunter Biden ពាក់ព័ន្ធនឹងការនិយាយកុហក អំពីការប្រើប្រាស់គ្រឿងញៀន នៅពេលដែលរូបគេបានទិញកាំភ្លើងមួយដើម នៅឆ្នាំ២០១៨ និងពាក់ព័ន្ធនឹងការគេចវេសពីការបង់ពន្ធចំនួន ១, ៤លានដុល្លារ។

លោកប្រធានាធិបតី Biden បានលើកលែងទោសឲ្យកូនប្រុសរបស់លោក កាលពីខែធ្នូ ជុំវិញបទល្មើសទាំងនោះ និងការប្រព្រឹត្តផ្សេងទៀត ដែលមានរយៈពេលជាង ១១ឆ្នាំហើយ បន្ទាប់ពីបានសន្យាថា លោកនឹងមិនធ្វើបែបនោះ។ ក្នុងរបាយការណ៍លើកលែងទោសនោះ លោក Biden បាននិយាយថា ករណីទាំងនោះ ត្រូវបានរងឥទ្ធិពលមិនត្រឹមត្រូវដោយសារមាន «ហេតុផលនយោបាយ»។

លោក Weiss បានសរសេរនៅក្នុងរបាយការណ៍ចុងក្រោយរបស់លោកថា៖ «សេចក្តីថ្លែងការណ៍នេះ គឺមិនសមហេតុផល និងខុសឆ្គង»។ លោក Weiss បានរៀបរាប់ថា៖ «ការរិះគន់នេះធ្វើឲ្យប៉ះពាល់ដល់មូលដ្ឋានគ្រឹះដែលធ្វើឲ្យប្រព័ន្ធយុត្តិធម៌របស់អាមេរិក មានភាពត្រឹមត្រូវ និងសមធម៌។ ទង្វើបែបនេះ បំផ្លាញទំនុកចិត្តសាធារណៈ ចំពោះស្ថាប័នដែលមានសារៈសំខាន់ ក្នុងការការពារនីតិរដ្ឋ»។

គួរបញ្ជាក់ថា បទប្បញ្ញត្តិរបស់ក្រសួងយុត្តិធម៌ តម្រូវឲ្យអ្នករដ្ឋអាជ្ញាពិសេសដែលត្រូវបានតែងតាំងឲ្យស៊ើបអង្កេតក្នុងកម្រិតមួយដែលឯករាជ្យពីថ្នាក់ដឹកនាំរបស់ក្រសួងនេះ ហើយផ្ដល់របាយការណ៍ចុងក្រោយ នៅពេលការស៊ើបអង្កេតរបស់ពួកគេ ត្រូវបានបញ្ចប់៕