កងកម្លាំងសន្តិសុខសូម៉ាលី បាននិយាយថា ពួកគេបានសម្លាប់ក្រុមយុទ្ធជនរដ្ឋឥស្លាមដេស ( Daesh) ជាច្រើននាក់ និងបានរឹបអូសបានទីតាំងរបស់ភេរវករចំនួន ៨កន្លែង អំឡុងពេលប្រតិបត្តិការយោធា ដែលកំពុងបន្ត នៅក្នុងតំបន់ Puntland ពាក់កណ្តាលស្វយ័ត។

ក្រុម Daesh មានវត្តមានតិចតួច ក្នុងប្រទេសសូម៉ាលី បើធៀបនឹងក្រុមអាល់កៃដា ដែលមានទំនាក់ទំនងនឹងក្រុម Al-Shabab ប៉ុន្តែក្រុមអ្នកជំនាញ បានព្រមានពីសកម្មភាព ដែលកំពុងកើនឡើង។

មន្ត្រីប្រឆាំងអំពើភេរវកម្មរបស់អង្គការសហប្រជាជាតិកាលពីឆ្នាំមុន បានព្រមានអំពីការកើនឡើងនៃការវាយប្រហារដោយក្រុម Daesh នៅក្នុងប្រទេសម៉ូសំប៊ិក សាធារណរដ្ឋប្រជាធិបតេយ្យកុងហ្គោ និងសូម៉ាលី។

មន្ត្រីយោធាសូម៉ាលី បាននិយាយថា ប្រតិបត្តិការកាលពីថ្ងៃចន្ទ នៅក្នុងខេត្តភាគខាងជើង គឺផ្តោតជុំវិញភ្នំ Cal Miskat នៅក្នុងតំបន់ Bari ។

កងទ័ពនៅតំបន់ Puntland បាននិយាយនៅក្នុងសេចក្តីថ្លែងការណ៍មួយថា៖«កងកម្លាំងសន្តិសុខ បានគ្រប់គ្រងប៉ុស្តិ៍យោធា Daesh ចំនួន ៨ ក្នុងនោះ មានទីតាំងសំខាន់មួយ នៅក្នុងភ្នំ Cal Miskat ខ្មាន់កាំភ្លើងជាច្រើននាក់ រួមទាំងយុទ្ធជនបរទេស ត្រូវបានសម្លាប់ នៅក្នុងប្រតិបត្តិការយោធានេះ។