បន្ទាប់ពីមានការប្រយុទ្ធគ្នា នៅតំបន់ Kursk នៅភាគខាងលិចដែលមានព្រិលធ្លាក់របស់ប្រទេសរុស្ស៊ី ក្នុងសប្តាហ៍នេះ កងកម្លាំងពិសេសអ៊ុយក្រែន បានរុករកសពទាហានសត្រូវកូរ៉េខាងជើងជាង ២០នាក់ដែលត្រូវបានសម្លាប់។

បើយោងតាមការពិពណ៌នា អំពីការប្រយុទ្ធគ្នាដែលត្រូវបានបង្ហោះ នៅលើបណ្ដាញសង្គមដោយកងកម្លាំងប្រតិបត្តិការពិសេសរបស់អ៊ុយក្រែន កាលពីថ្ងៃចន្ទ (ទី១៣ ខែមករា) បានឲ្យដឹងថា ក្នុងចំណោមទាហានទាំងនោះ ពួកគេបានរកឃើញម្នាក់នៅមានជីវិត ប៉ុន្តែនៅពេលដែលពួកគេចូលទៅកៀក ពលទាហានរូបនោះ បានបំផ្ទុះគ្រាប់បែកដៃធ្វើអត្តឃាត។ 

យ៉ាងណាក្ដី កងកម្លាំងបានបញ្ជាក់ថា ទាហានរបស់ខ្លួន បានគេចផុតពីការបំផ្ទុះនេះ ដោយមិនមានរបួសអ្វីឡើយ។ សារព័ត៌មាន Reuters មិនអាចផ្ទៀងផ្ទាត់បញ្ជាក់ពីហេតុការណ៍នេះបានទេ។

ប៉ុន្តែករណីនេះស្ថិតក្នុងចំណោមភស្តុតាងច្រើនឡើងៗពីសមរភូមិ របាយការណ៍ស៊ើបការណ៍សម្ងាត់ និងការផ្ដល់សក្ខីកម្មពីអ្នករត់ចោលស្រុកទេស ដែលបង្ហាញថា ទាហានកូរ៉េខាងជើងមួយចំនួន កំពុងជ្រើសរើសជម្រើសចុងក្រោយប្រើប្រាស់វិធានការធ្ងន់ធ្ងរ ខណៈដែលពួកគេគាំទ្រសង្គ្រាមរយៈពេល ៣ឆ្នាំរបស់រុស្ស៊ីជាមួយអ៊ុយក្រែន។

ដោយសុំនិយាយជាមួយនឹងការប្រាប់តែឈ្មោះនាមត្រកូល ដោយសារភ័យខ្លាចមានការសងសឹកលើគ្រួសាររបស់លោកដែលរស់នៅកូរ៉េខាងជើង អតីតទាហានកូរ៉េខាងជើងដែលបានភៀសខ្លួនទៅកូរ៉េខាងត្បូង ក្នុងឆ្នាំ២០២២ គឺលោក Kim អាយុ ៣២ឆ្នាំ បានប្រាប់ថា៖ «ទាំងការបំផ្ទុះខ្លួនឯង និងការធ្វើអត្តឃាត នោះគឺជាការពិត អំពីប្រទេសកូរ៉េខាងជើង»៕