រដ្ឋមន្ត្រីទទួលបន្ទុកកងកម្លាំងនគរបាល លោក Itamar Ben-Gvir ខាងក្រុមស្តាំនិយមជ្រុលរបស់អ៊ីស្រាអែល នៅថ្ងៃអង្គារ (ទី១៤ ខែមករា) នេះ បានគំរាមថា នឹងចាកចេញពីរដ្ឋាភិបាលរបស់លោក Benjamin Netanyahu ប្រសិនបើនាយករដ្ឋមន្ត្រីរូបនេះព្រមព្រៀងឲ្យមានបទឈប់បាញ់ នៅតំបន់ហ្កាហ្សា និងកិច្ចព្រមព្រៀងដោះលែងចំណាប់ថ្នូរ ដែលកំពុងត្រូវបានចរចា នៅឯកិច្ចពិភាក្សា ក្នុងប្រទេសកាតា។

លោក Ben-Gvir ដែលការដើរចេញរបស់លោក នឹងមិនធ្វើឲ្យរដ្ឋាភិបាលរបស់លោក Netanyahu ជាប់គាំងនោះ បានជំរុញឲ្យរដ្ឋមន្ត្រីហិរញ្ញវត្ថុ លោក Bezalel Smotrich ចូលរួមជាមួយលោក ជាការប៉ុនប៉ងលើកចុងក្រោយ ដើម្បីរារាំងកុំឲ្យមានកិច្ចព្រមព្រៀងបទឈប់បាញ់ ដែលលោកបានពិពណ៌នាថា ជាការចុះញ៉មដ៏គ្រោះថ្នាក់ ចំពោះក្រុមហាម៉ាស។

លោក Ben-Gvir បានលើកឡើងនៅលើបណ្ដាញសង្គម X ថា៖ «វិធានការនេះ គឺជាឱកាសតែមួយគត់របស់យើង ដើម្បីទប់ស្កាត់ការបញ្ចប់ (កិច្ចព្រមព្រៀង) និងការពារកុំឲ្យមានការចុះញ៉មរបស់អ៊ីស្រាអែល ចំពោះក្រុមហាម៉ាស បន្ទាប់ពីមានសង្គ្រាមបង្ហូរឈាមជាង ១ឆ្នាំ ដែលទាហានរបស់ IDF (កងកម្លាំងការពារជាតិអ៊ីស្រាអែល) ជាង ៤០០នាក់ បានពលីជីវិត នៅតំបន់ហ្កាហ្សាស្ទ្រីប និងដើម្បីធានាថា ការលះបង់របស់ពួកគេ គឺមិនឥតប្រយោជន៍នោះឡើយ»។ 

ចំណែកលោក Smotrich បាននិយាយកាលពីថ្ងៃចន្ទថា លោកជំទាស់នឹងកិច្ចព្រមព្រៀងនេះ ប៉ុន្តែមិនបានគំរាមចែកផ្លូវជាមួយរដ្ឋាភិបាលចម្រុះរបស់លោក Netanyahu នោះទេ។ រដ្ឋមន្ត្រីភាគច្រើនត្រូវបានគេរំពឹងថា នឹងគាំទ្រកិច្ចព្រមព្រៀងបទឈប់បាញ់ជាដំណាក់កាលនេះ ដែលរៀបរាប់លម្អិត អំពីការបញ្ឈប់ការប្រយុទ្ធ និងការដោះលែងចំណាប់ថ្នូរ៕