ភ្នំពេញ​​ ៖ ក្រោយពីក្រុមហ៊ុនប្រកាសយកកំរ៉ៃចំនួន២០ភាគរយជួយទៅដល់មន្ទីរកុមារអង្គរ មានបងប្អូនប្រជាពល រដ្ឋកាន់តែច្រើននាំគ្នាទៅទិញដីឡូដ៍នៃគម្រោងរបស់ក្រុមហ៊ុនប៉ាងណាគ្រី ដែលស្ថិតនៅភូមិអូរអំពិល ឃុំទួលពង្រ ស្រុកម៉ាឡៃ ខេត្ត បន្ទាយមានជ័យនោះ។

 នៅក្នុងពិធីប្រកាសលក់ និងកក់លុយពីអតិថិជន កាលពីថ្ងៃទី៦ ខែវិច្ឆិកា ម្សិលមិញនេះ លោក ខេមរៈសេរីមន្តតារាចំរៀននៅកម្ពុជា ហើយជាដៃគូរវិនិយោគជាមួយក្រុមហ៊ុន ប៉ាងណាគ្រីនោះ បានលើកឡើងថា នៅថ្ងៃនេះមានបងប្អូនប្រជាពលរដ្ឋចំនួន៤០០នាក់បាននាំគ្នាមកទិញផ្តាច់ និងបងប្អូនខ្លះមកធ្វើការកក់លុយដើម្បីទទួលបានដីឡូដ៍របស់ក្រុមហ៊ុន ខណៈគម្រោងវិនិយោគរបស់ក្រុមហ៊ុនមានទំហំដីចំនួន២០០ហិកតា ដោយក្នុងនោះមានការវិនិយោគរោងចក្រ មជ្ឈមណ្ឌលកំសាន្ត និងសាលាបណ្តុះបណ្តាល ជំនាញវិជ្ជាជីវៈផងដែរ។

 លោកខេមរសេរីមន្ត បានឲ្យដឹងទៀតថា ក្រោយពីបងប្អូនប្រជាពលរដ្ឋទិញផ្តាច់ ឬបានកក់លុយ ដំបូងចំនួន១០០ដុល្លារហើយនោះបងប្អូនប្រជាពលរដ្ឋអាចសាងសង់លំនៅដ្ឋានបានភ្លាម ខណៈថវិកាចំ នួន២០ភាគរយក្រុមហ៊ុននឹងយកទៅជួយដល់មន្ទីរពេទ្យកុមារអង្គរ ដែលជាមន្ទីរពេទ្យធ្វើការព្យាបាលកុមារ កម្ពុជាដោយមិនគិតលុយនោះ។

 លោកខេមរសេរីមន្ត បានលើកឡើងទៀតថា ដោយសារប្រទេសមានសុខសន្តិភាព ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្រ្តី ហើយមានការជឿជាក់ និងគាំទ្រពីបងប្អូនប្រជាពលរដ្ឋផងនោះ ក្រុមហ៊ុននឹងធ្វើការអភិវឌ្ឍតំបន់នេះ ឲ្យក្លាយទៅជាតំបន់សេដ្ឋកិច្ចពិសេស ដូចទៅនឹងទីក្រុងប៉ោយប៉ែតយ៉ាងដូច្នេះដែរ ដោយក្រុម ហ៊ុននឹងអភិវឌ្ឍន៍រោងចក្រ.ផ្សារ.សាលារៀន.សាលាបច្ចេកទេសសម្រាប់បណ្ដុះបណ្ដាលជំនាញជូនដល់យុវជន ជាពិសេសកូនអ្នកស្រុកដែលរស់នៅតំបន់នោះតែម្តង។ 

 សូមបញ្ជាក់ថា ការបង់លុយសម្រាប់ដីឡូដ៍មួយល្វែងគឺត្រឹមតែ៣៣០០រៀលប៉ុណ្ណោះក្នុងមួយថ្ងៃហើយបើគិតជាខែចំនួនដប់ម៉ឺនរៀលក្នុងមួយខែ ហើយបើបងប្អូនធ្វើការបង់ផ្តាច់គឺមួយឡូដ៍ត្រឹមតែ១៩៥០ ដុល្លារតែប៉ុណ្ណោះ៕អត្ថបទ ៖​​ ចក់