ទីភ្នាក់ងារព្រំដែន Frontex របស់សហភាពអឺរ៉ុប (EU) នៅថ្ងៃអង្គារ (ទី១៤ ខែមករា) នេះ បានឲ្យដឹងថា ចំនួនជនអន្តោប្រវេសន៍ចូល EU តាមច្រកផ្លូវខុសច្បាប់ ជារួមបានធ្លាក់ចុះចំនួន ៣៨ភាគរយ ក្នុងឆ្នាំ២០២៤ ដែលឈានដល់កម្រិតទាបបំផុត គិតចាប់តាំងពីឆ្នាំ២៩២១ មក។

តែទោះបីជាយ៉ាងណាក្ដី Frontex បានឲ្យដឹងថា ចំនួនមនុស្សឆ្លងកាត់ពីព្រំដែន EU ជាមួយប្រទេសបេឡារុស និងរុស្ស៊ី បានកើនឡើង ១៩២ភាគរយ ពោលគឺឡើងដល់ចំនួន ១៧.០០០នាក់។ ជនអន្តោប្រវេសន៍ ឬអ្នកស្វែងរកសិទ្ធិជ្រកកោន ក្នុងចំនួនដ៏ច្រើន ក៏មានមកពីប្រទេសស៊ីរី អាហ្វហ្គានីស្ថាន អេហ្ស៊ីប និងបណ្តាប្រទេស នៅទ្វីបអាហ្រ្វិកផងដែរ ទោះបីជាពួកគេបានផ្លាស់ប្តូរផ្លូវចូលទៅក្នុងប្លុកនេះក៏ដោយ។

គួរបញ្ជាក់ថា ជនអន្តោប្រវេសន៍ខុសច្បាប់ បានក្លាយជាបញ្ហាដ៏សំខាន់ នៅក្នុងនយោបាយអ៊ឺរ៉ុប ដោយគណបក្សប្រកាន់ស្តាំនិយមជ្រុល និងប្រជានិយមជាច្រើន ដែលធ្វើយុទ្ធនាការ ទាំងនៅក្នុងការបោះឆ្នោត នាពេលថ្មីៗនេះ និងនាពេលខាងមុខ ក្នុងនោះរួមទាំងនៅប្រទេសអាល្លឺម៉ង់ នាខែក្រោយផងដែរនោះ សន្យាថា នឹងរឹតបន្តឹងលើជនអន្តោប្រវេសន៍។

Frontex បានប្រាប់ឲ្យដឹងថា ការធ្លាក់ចុះការឆ្លងកាត់តាមព្រំដែនខុសច្បាប់ កាលពីឆ្នាំមុន ដោយមកនៅត្រឹមតែជាង ២៣៩.០០០នាក់នេះ គឺដោយសាររឹតបន្តឹងរបស់ EU និងកិច្ចសហប្រតិបត្តិការជាដៃគូ ប្រឆាំងនឹងបណ្តាញរត់ពន្ធ។ នេះជាកម្រិតទាបបំផុត គិតចាប់តាំងពីឆ្នាំ២០២១ ជាពេលដែលអន្តោប្រវេសន៍ នៅតែរងផលប៉ះពាល់ដោយសារជំងឺរាតត្បាតកូវីដ-១៩៕