នាយករដ្ឋមន្រ្តីឥណ្ឌាលោក Narendra Modi បានបើកសម្ពោធដាក់ឲ្យប្រើប្រាស់ផ្លូវក្រោមដី ដើម្បីបង្កើនការតភ្ជាប់ និងការអភិវឌ្ឍវិស័យទេសចរណ៍នៅដែនដីសហព័ន្ធ Jammu and Kashmir ។

គម្រោងផ្លូវក្រោមដី Sonamarg ដែលមានប្រវែងប្រហែល ១២គ.ម ត្រូវបានសាងសង់ឡើងដោយចំណាយអស់ទឹកប្រាក់ ៣១១លានដុល្លារ ដើម្បីធានាដល់ការតភ្ជាប់តំបន់ជ្រលងភ្នំ Srinagar និងទីក្រុងLadak ។

លោក Modi បានធ្វើការសង្កត់ធ្ងន់ថា ផ្លូវក្រោមដីនេះ ត្រូវបានសាងសង់ឡើង ដើម្បីធ្វើឲ្យល្អប្រសើរឡើងការទៅដល់មន្ទីរពេទ្យធំៗ អំឡុងពេលបិទផ្លូវ ដែលតែងតែបង្កឡើងដោយសារបំណាក់ទឹកកក បំណាក់ដី និងព្រិលធ្លាក់ខ្លាំងក្នុងតំបន់កាស្មៀ ។

លោកនិយាយថា ការតភ្ជាប់ល្អប្រសើរឡើងនៅក្នុងដែនដីសហព័ន្ធ អាចធ្វើឲ្យភ្ញៀវទេសចរ រុករកតំបន់ដែលមិនទាន់រកឃើញ និងតំបន់ដែលគេស្គាល់តិចតួចនៅតំបន់ Jammu and Kashmir ។

លោកបន្តថា ផ្លូវក្រោមដីជាង ១៤ខ្សែបន្ថែមទៀតដូចគ្នានឹងផ្លូវក្រោមដី Sonamarg បាននឹងកំពុងសាងសង់ ធ្វើឲ្យតំបន់ Jammu and Kashmir ស្ថិតក្នុងតំបន់តភ្ជាប់ខ្លាំងបំផុតនៅក្នុងប្រទេសឥណ្ឌា ។

សូមបញ្ជាក់ថា តំបន់ Jammu and Kashmir ដែលជាដែនដីភាគច្រើនជាជនមូស្លីមតែមួយគត់របស់ឥណ្ឌា បានស្ថិតនៅកណ្តាលជម្លោះដែនដីជាមួយប៉ាគីស្ថាន ចាប់តាំងពីប្រទេសជិតខាងមួយនេះ ទទួលបានឯករាជ្យពីអាណានិគមអង់គ្លេស កាលពីឆ្នាំ ១៩៤៧ ៕