ទិន្នន័យរបស់អង្គការសហប្រជាជាតិ (UN) បានបង្ហាញនៅថ្ងៃអង្គារ (ទី១៤ ខែមករា) នេះថា មនុស្សជាង ១លាននាក់ ដោយជាងពាក់កណ្តាលនៃពួកគេជាកុមារ ឥឡូវនេះ បានបង្ខំចិត្តធ្វើបម្លាស់លំនៅ ក្នុងប្រទេសហៃទី ជាកន្លែងដែលអំពើហិង្សារបស់ក្រុមអន្ធពាល នៅតែបន្តកើតមានឥតស្រាកស្រាន្ត បើទោះបីជាមានការចាប់ផ្តើមនូវបេសកកម្មសន្តិសុខដែលគាំទ្រដោយ UN កាលពីឆ្នាំមុនក៏ដោយ។

ជនភៀសខ្លួនសរុបចំនួន ១,០៤លាននាក់ដែលត្រូវបានចេញផ្សាយដោយអង្គការអន្តរជាតិទទួលបន្ទុកជនអន្តោប្រវេសន៍ (IOM) បង្ហាញពីការកើនឡើង ៣ដង ធៀបនឹងខែធ្នូ ឆ្នាំ២០២៣ នៅពេលដែលមនុស្ស ៣១៥.០០០នាក់ គ្មានផ្ទះសម្បែងរស់នៅ។ បើតាមទិន្នន័យរបស់ UN បានឲ្យដឹងថា មិនធ្លាប់មានពីមុនមកនោះទេ ដែលមនុស្សចំនួនច្រើនខ្លាំងបែបនេះត្រូវបានផ្លាស់ទីលំនៅដោយសារអំពើហិង្សាក្នុងប្រទេស។

នៅក្នុងសេចក្តីថ្លែងការណ៍មួយផ្ញើទៅកាន់អ្នកសារព័ត៌មាន ដោយសង្កត់ធ្ងន់ពីតម្រូវការ ដើម្បីដោះស្រាយមូលហេតុឫសគល់នៃអំពើហិង្សា និងអស្ថិរភាព អគ្គនាយកអង្គការ IOM លោកស្រី Amy Pope បានរៀបរាប់ថា៖ «ប្រទេសហៃទីត្រូវការជំនួយមនុស្សធម៌ប្រកបដោយនិរន្តរភាព ឥឡូវនេះតែម្ដង ដើម្បីជួយសង្រ្គោះ និងការពារអាយុជីវិតរបស់មនុស្សទាំងអស់»។

គួរបញ្ជាក់ថា ក្រុមអន្ធពាលប្រដាប់អាវុធ ក្នុងប្រទេសហៃទី ឥឡូវនេះ គ្រប់គ្រងស្ទើរតែទាំងស្រុងលើរដ្ឋធានី Port-au-Prince និងរាលដាលទៅកាន់តំបន់កាន់តែធំឡើងៗ នៅទូទាំងប្រទេស។ បេសកកម្មអន្តរជាតិមួយដែលត្រូវបានអនុម័តកាលពីឆ្នាំមុន ដោយមានភារកិច្ចស្តារសណ្តាប់ធ្នាប់ឡើងវិញនោះ រហូតមកដល់ពេលនេះ ឃើញតែផ្នែកមួយនៃកងទ័ពប៉ុណ្ណោះដែលកំពុងត្រូវបានដាក់ពង្រាយ ទោះបីជាទាហានហ្គាតេម៉ាឡា ២កងពល បានទៅដល់ក្នុងខែនេះ ដើម្បីជួយពង្រឹងកងកម្លាំងបេសកកម្មក៏ដោយ៕