ប្រធានគណបក្ស ១រូប នៅថ្ងៃអង្គារ (ទី១៤ ខែមករា) នេះ បាននិយាយថា គណបក្សប្រឆាំងរបស់ប្រទេសស្លូវ៉ាគី នឹងអំពាវនាវឲ្យមានការបោះឆ្នោតដកសេចក្ដីទុកចិត្ត ចំពោះរដ្ឋាភិបាល ដោយចោទប្រកាន់នាយករដ្ឋមន្ត្រី លោក Robert Fico ថា បានបង្កើតឲ្យមានគោលនយោបាយការបរទេសស្និទ្ធនឹងរុស្ស៊ី ខណៈដែលមិនអាចដោះស្រាយបញ្ហា ក្នុងប្រទេស។

ក្រុមចម្រុះជាតិនិយមប្រកាន់ឆ្វេងនិយមដែលកំពុងកាន់អំណាចរបស់លោក Fico កាន់តែមានភាពរង្គោះរង្គើ ក្នុងប៉ុន្មានខែថ្មីៗនេះ ដោយសំឡេងភាគច្រើនរបស់ក្រុមនេះបានធ្លាក់ចុះមកនៅត្រឹម ៧៦កៅអី ក្នុងចំណោមអាសនៈចំនួន ១៥០ នៅក្នុងសភា។ លោក Fico កំពុងប្រឈមនឹងការមិនពេញចិត្តពីសមាជិកសភានៃគណបក្សតូចៗមួយចំនួន ហើយក៏មានជម្លោះក្នុងចំណោមរដ្ឋាភិបាលចម្រុះរបស់លោកផងដែរ។

យ៉ាងណាក្ដី គេមិនទាន់ដឹងច្បាស់ទេថា តើការបោះឆ្នោតនឹងប្រព្រឹត្តទៅនៅពេលណានោះ។ គណបក្សប្រឆាំងនឹងត្រូវការសំឡេងភាគច្រើន ដើម្បីទទួលបានជោគជ័យ ក្នុងដំណើរការនេះ ជាលទ្ធផលដែលនឹងជំរុញឲ្យប្រធានាធិបតីស្លូវ៉ាគីតែងតាំងរដ្ឋាភិបាលថ្មី។ សភាក៏អាចយល់ព្រមឲ្យរៀបចំការបោះឆ្នោតមុនអាណត្តិផងដែរ ទោះបីជាវិធានការបែបនេះត្រូវការការគាំទ្រទាំងពីបក្សប្រឆាំង និងរដ្ឋាភិបាលក៏ដោយ។

គួរបញ្ជាក់ថា រដ្ឋាភិបាលស្លូវ៉ាគី កំពុងប្រឈមនឹងបញ្ហាក្នុងស្រុកធំៗជាច្រើន ក្នុងនោះរួមមានទាំងបញ្ហាឱនភាពថវិកាខ្ពស់ ប្រព័ន្ធថែទាំសុខភាព និងការបញ្ឈប់ការបញ្ជូនឆ្លងកាត់នូវឧស្ម័នរុស្ស៊ី តាមរយៈអ៊ុយក្រែន ដែលលោក Fico និយាយថា បានប៉ះពាល់ដល់សេដ្ឋកិច្ចរបស់ប្រទេសខ្លួន៕