អ្នកនាំពាក្យក្រសួងការបរទេសកាតាលោក Majed Al-Ansari បាននិយាយនៅថ្ងៃអង្គារនេះថា កាតាបានបញ្ជូនសេចក្តីស្នើច្បាប់លើកិច្ចព្រមព្រៀងបទឈប់បាញ់ទៅដល់ភាគីក្រុមហាម៉ាស់ និងអ៊ីស្រាអែលរួចរាល់អស់ហើយៗនេះគឺជាចំណុចជិតបំផុតនៃកិច្ចព្រមព្រៀងក្នុងរយៈពេលជាច្រើនខែកន្លងមកនេះ ។

ក្រុមអ្នកចរចា បានជួបជុំគ្នានៅទីក្រុងដូហា នាថ្ងៃអង្គារនេះ ដើម្បីបញ្ចប់រឿងរ៉ាវលម្អិតនៃផែនការបញ្ចប់សង្រ្គាមនៅតំបន់ហ្កាហ្សា ដែលបានធ្វើឲ្យរង្គោះរង្គើរយ៉ាងខ្លាំងដល់តំបន់មជ្ឈិមបូព៌ា ក្រោយប្រធានាធិបតីជិតចាកចេញពីអំណាចសហរដ្ឋអាមេរិកលោក Joe Biden ចង្អុរបង្ហាញថា បទឈប់បាញ់ និងកិច្ចព្រមព្រៀងដោះលែងចំណាប់ថ្នូរជិតកើតមានហើយ ។

លោក Majed និយាយប្រាប់សន្និសីទសារព័ត៌មានថា កិច្ចពិភាក្សាលើរឿងរ៉ាវលម្អិតផ្តាច់ព្រ័ត្រ ត្រូវបានធ្វើឡើង ហើយនេះគឺជាចំណុចខិតជិតបំផុតនៃការឈានដល់កិច្ចព្រមព្រៀង ។

លោកបន្តថា ពួកយើងសូមធ្វើការស្ងើចសរសើរ ជាពិសេសដល់តួនាទីរបស់រដ្ឋបាលលោក Biden និងរដ្ឋបាលជិតចូលកាន់អំណាចរបស់លោកប្រធានាធិបតីជាប់ឆ្នោត Donald Trump នៅក្នុងកិច្ចប្រជុំនារយៈពេលប៉ុន្មានសប្តាហ៍ចុងក្រោយនេះ ។ 

លោកថា ពួកគេបានចូលរួមពាក់ព័ន្ធយ៉ាងពេញទំហឹងនៅក្នុងកិច្ចប្រជុំ ។ ពួកគេបានធ្វើការរួមគ្នានៅទីនេះ នៅទីក្រុងដូហា និងនៅឆ្ងាយពីតំបន់ ដើម្បីប្រាកដថា កិច្ចព្រមព្រៀងបទឈប់បាញ់តំបន់ហ្កាហ្សា នឹងកើតមានឡើង ៕