កំពង់ធំ៖ ផ្ទះថ្មីរបស់សម្តេចតេជោ ហ៊ុន សែន នៅតែបន្តផ្តល់ជូនគ្រួសារអតីតយុទ្ធជន ដែលមានជីវភាពខ្វះខាត ពុំមានលទ្ធភាពធ្វើគេហដ្ឋានសមរម្យ ដែលគិតមកដល់ពេលនេះមានចំនួន១៧៤ខ្នងហើយនៅក្នុងខេត្តកំពង់ធំ។
នៅទី០១ ខែវិច្ឆិកា ឆ្នាំ២០២០ លោកឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ បានដឹកនាំសហការីប្រគល់ផ្ទះខ្នងទី១៧៤ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា តាមរយៈឯកឧត្តម នាយឧត្ដមសេនីយ៍ គន់ គីម អគ្គលេខាធិការសមាគមអតីតយុទ្ធជនកម្ពុជា ជូនគ្រួសារអតីតយុទ្ធជន នៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ។
គ្រួសារអតីតយុទ្ធជនដែលបានទទួលផ្ទះថ្មីនេះមានឈ្មោះ ម៉ុន សៀងហៃ អាយុ៥៥ឆ្នាំ មានកូនចំនួន០៤នាក់ ដែលស្វាមីរបស់គាត់បានទទួលមរណភាពចោលគាត់ដោយសារជំងឺដែលបច្ចុប្បន្នក្រុមគ្រួសារគាត់ប្រកបមុខរបរជាកម្មករសំណង់ ។
ជាមួយគ្នានេះដែរ លោកឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ ក៏បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដែលជានិច្ចកាលសម្តេចទាំងទ្វេ តែងតែយកចិត្តទុក្ខដាក់ដល់បងប្អូនអតីតយុទ្ធជន នៅគ្រប់ទីកន្លែង និងបានលើកឡើងថា ទាំងនេះជាការដឹងគុណដ៏ធំធេងដល់អតីតយុទ្ធជនដែលកន្លងមកបងប្អូនបានចូលរួមចំណែកជាមួយសម្តេចតេជោក្នុងការអនុវត្តន៍ នូវនយោបាយ ឈ្នះ ឈ្នះ ធ្វើឲ្យប្រទេសជាតិមានសុខសន្តិភាពពេញលេញ និងការអភិវឌ្ឍ។ លោកបញ្ជាក់ថា ផ្ទះថ្មីដែលប្រគល់ជូននាពេលនេះមានទំហំ ៤មx៦ម ធ្វើអំពីឆ្អឹងដែក ដំបូងប្រក់ស័ង្កសីកិនភ្លី ជញ្ជាំងស្មាតប៊ត និងរនាបក្តារ។
ក្នុងឱកាសប្រគល់ផ្ទះថ្មីនេះ ឧត្ដមសេនីយ៍ ទោ សោម ស៊ុន បាននាំយកនូវអំណោយគ្រឿងឧបភោគបរិភោគរបស់ ឯកឧត្តម ឧត្តមសេនីយ៍ឯក បណ្ឌិត ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក ផ្តល់ជូនគាត់បន្ថែមនៅពេលនេះរួមមាន អង្ករ ៥០ គ.ក្រ , មីចំនួន ០២កេស , ទឹកត្រី ទឹកស៊ីអ៉ីវ ចំនួន ០២ យួរ ទឹក ពិសារ បរិសុទ្ធ កម្ពុជា ចំនួន មួយ កេស និងថវិកាមួយចំនួនផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
