ទីក្រុង La Paz បានក្លាយជាវេទិកាសម្រាប់ការតវ៉ា បន្ទាប់ពីនគបាលបានចាប់ខ្លួនអ្នកគាំទ្រអតីតប្រធានាធិបតី លោក Evo Morales និងអាជីវករជាច្រើននាក់ ដែលបានចេញធ្វើបាតុកម្មនៅតាមដងផ្លូវ ដើម្បីទាមទារវិធានការសេដ្ឋកិច្ចពីរដ្ឋាភិបាល កាលពីថ្ងៃអង្គារ ទី១៤ ខែមករា។

អ្នកគាំទ្ររបស់លោក Morales ដែលបានមកដល់ទីក្រុង កាលពីថ្ងៃចន្ទ ទី១៣ ខែមករា បន្ទាប់ពីដង្ហែរក្បួនចម្ងាយ១០០គីឡូម៉ែត្រពីទីក្រុងប៉ាតាកាម៉ាយ៉ា(Patacamaya) ដើម្បីគាំទ្រមេដឹកនាំ ជាអ្នកដែលកំពុងត្រូវបានស៊ើបអង្កេតពីបទជួញដូរមនុស្ស និងជាអ្នកទាមទារវិធានការសេដ្ឋកិច្ច បានជួបប្រទះជាមួយនគរបាល នៅជិតអគារអនុប្រធានាធិបតី។

នៅទីតាំងនោះ នគរបាល បានចាប់ខ្លួនមនុស្សប្រហែល៥០ នាក់ នេះបើយោងតាមសាក្សីរបស់សារព័ត៌មាន Reuters ។

អាជីវករ មកពី ទីក្រុង El Alto ក៏បានមកប្រមូលផ្តុំគ្នានៅទីក្រុង La Paz ដោយបានដង្ហែក្បួនតាមដងផ្លូវនិងស្រែកពាក្យស្លោកដូចជា «ចេញពីប្រទេសបូលីវី រដ្ឋាភិបាលដែលអសមត្ថភាព» និងទាមទារដំណោះស្រាយចំពោះវិបត្តិសេដ្ឋកិច្ច។

យោងតាមមេធាវីរបស់លោក បានឲ្យដឹងថា អតីតប្រធានាធិបតីប្រទេសបូលីវី លោក Evo Morales ពុំបានចូលរួមក្នុងសវនាការទេ កាលពីថ្ងៃអង្គារ ទី ១៤ ខែមករា ក្នុងសំណុំរឿងនៃការជួញដូរមនុស្ស ដែលត្រូវបានប្តឹងលើរូបលោក ដោយលោកបានលើកឡើងពីហេតុផលសុខភាព។

សវនាការត្រូវបានពន្យារពេល និងកំណត់ពេលឡើងវិញនៅថ្ងៃសុក្រ ទី១៧ ខែមករា ដោយមេធាវីការពារក្តីបានផ្តល់រយៈពេល៤៨ម៉ោង ដើម្បីបង្ហាញភស្តុតាងផ្នែកវេជ្ជសាស្រ្តបញ្ជាក់ពីជំងឺរបស់អតីតប្រធានាធិបតី រូបនេះ។