បាល់ទាត់៖ ពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១ នឹងចាប់ផ្ដើមការប្រកួតជម្រុះវគ្គ ១៦ក្រុមចុងក្រោយនាថ្ងៃទី០៩ និងថ្ងៃទី១០ ខែវិច្ឆិកានេះហើយជាមួយនឹងការកែប្រែរូបមន្ដប្រកួតថ្មីចាញ់ធ្លាក់ ដោយក្រុមនីមួយៗត្រូវប្រកួតតែ ១ជើងប៉ុណ្ណោះដើម្បីកាត់សេចក្ដីរកបេក្ខភាពឡើងវគ្គបន្ដ។
ចំពោះកម្មវិធីប្រកួតនៅថ្ងៃទី០៩-វិច្ឆិកាស្អែកនេះ រួមមានក្រុមវិសាខាជួបក្រុមខេត្តបន្ទាយមានជ័យនៅកីឡដ្ឋានព្រីនស៍ ខណៈណាហ្គាវើលដ៏ ជួបក្រុមនគរបាលជាតិនៅកីឡដ្ឋានស្ដាតចាស់នាម៉ោង ៣រសៀលដូចគ្នា។ រីឯក្រុមភ្នំពេញក្រោនត្រូវជួបក្រុមជើងឯករងពានថ្នាក់ខេត្តគឺខេត្តត្បូងឃ្មុំនៅកីឡដ្ឋាន Smart RSN និងក្រុមព្រះខ័នរាជស្វាយរៀងបើកទ្វារផ្ទះ ទទួលក្រុមជើងឯកពានថ្នាក់ខេត្តគឺក្រុមកោះកុងអេហ្វស៊ីនាម៉ោង ៦ល្ងាចដូចគ្នា។ ដោយឡែកការប្រកួតនៅថ្ងៃទី១០-វិច្ឆិកាមាន ៤គូដែលសុទ្ធតែប្រកួតនាម៉ោង ៣រសៀលដូចគ្នា រួមមានក្រុមបឹងកេតជួបក្រុមសូលទីឡូអង្គរនៅកីឡដ្ឋានខេមបូឌាអ៊ែរវ៉េ។ ក្រុមអង្គរថាយហ្គឺរបើកទ្វារកីឡដ្ឋាន SRU ខេត្តសៀមរាបទទួលក្រុមជើងឯកពានថ្នាក់ខេត្តឆ្នាំចាស់គឺខេត្តព្រៃវែង។ ក្រុមកងយោធពលខេមរភូមិន្ទជួបក្រុមភ្ញៀវអគ្គិសនីកម្ពុជានៅកីឡដ្ឋានស្ដាតចាស់ និងក្រុមគិរីវង់សុខសែនជ័យបើកទ្វារផ្ទះកីឡដ្ឋានគិរីវង់ទទួលក្រុមអាស៊ីអឺរ៉ុបយូណាយធីត។
គួរដឹងថា ដោយសារការអូសបន្លាយនៃជំងឺកូវីដ-១៩ បានធ្វើឲ្យពានសម្ដេចតេជោ ហ៊ុន សែន ត្រូវបានពន្យារពេលជាយូរ។ ការណ៍នេះនាំឲ្យគណៈកម្មការរៀបចំការប្រកួត សម្រេចកែប្រែប្រព័ន្ធលេងថ្មីដោយវគ្គ ១៦ក្រុម និងវគ្គ ៨ក្រុមនឹងត្រូវលេងចាញ់ធ្លាក់មិនមានការប្រកួត ២ជើងដូចរដូវកាលមុនៗឡើយ។ ដូច្នេះក្រុមទទួលបានជ័យជម្នះនៃវគ្គនីមួយៗ នឹងទទួលបានកៅអីវគ្គបន្ដរហូតដល់វគ្គផ្ដាច់ព្រ័ត្រ ដែលគ្រោងប្រកួតបញ្ចប់នាថ្ងៃទី២៥ ខែវិច្ឆិកាខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
