ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលនឹងចូលកាន់តំណែងនៅពេលខាងមុខ បាននិយាយថា លោកនឹងបង្កើតអង្គភាពរដ្ឋាភិបាលមួយ ហៅថា អង្គភាពសេវាប្រាក់ចំណូលពីខាងក្រៅ ដែលនឹងត្រូវបំពេញភារកិច្ចប្រមូលពន្ធ ពន្ធគយ និងចំណូលផ្សេងៗទៀតពីបរទេស។

លោក Trump បានបង្ហោះសារដូច្នេះនៅលើបណ្តាញផ្សព្វផ្សាយសង្គមកាលពីថ្ងៃអង្គារ។ លោកនិយាយថា លោកនឹងបើកអង្គភាពនេះ នៅថ្ងៃទី២០ ខែមករា ជាថ្ងៃដែលលោកចូលកាន់តំណែង។

លោក Trump បានសរសេរថា «រយៈពេលជាយូរមកហើយ យើងបានពឹងផ្អែកលើការយកពន្ធលើប្រជាជនដ៏អស្ចារ្យរបស់យើង ដោយប្រើប្រាស់អង្គភាពសេវាកម្មចំណូលតែខាងក្នុង។

លោក Trump បានសរសេរថា រដ្ឋបាលរបស់លោកនឹងដាក់ពន្ធលើប្រទេសនានា ដែល «រកលុយបានពីការកេងចំណេញពាណិជ្ជកម្មជាមួយសហរដ្ឋអាមេរិក។ លោកបាននិយាយបន្ថែមថា នៅទីបំផុតប្រទេសទាំងនោះ នឹងត្រូវ«ចែករំលែកប្រាក់ចំណេញដោយសមធម៌»។

ប្រធានាធិបតីជាប់ឆ្នោតរូបនេះ បានស្នើឱ្យដាក់ពន្ធ២៥ ភាគរយលើការនាំចូលទាំងអស់ពីប្រទេសម៉ិកស៊ិក និងកាណាដា ហើយលោកក៏មានផែននការបង្កើនពន្ធដែលមានស្រាប់លើមុខទំនិញមកពីប្រទេសចិន ដោយការដាក់ពន្ធបន្ថែម ១០ ភាគរយ។

ក្រុមអ្នកសង្កេតការណ៍ កំពុងរង់ចាំមើលថាតើប្រទេស និងផលិតផលណាខ្លះ ដែលនឹងត្រូវកំណត់គោលដៅដោយការដាក់ពន្ធរបស់លោក Trump បន្ទាប់ពីការឡើងកាន់តំណែង នៅសប្តាហ៍ក្រោយ។