ផ្សែងអ័ព្ទដ៏ក្រាស់ និងអាកាសធាតុត្រជាក់ បានបន្តរំខានដល់ជីវិតប្រចាំថ្ងៃរបស់ប្រជាជន ដោយពន្យារពេលរថភ្លើង និងជើងហោះហើរជាច្រើន នៅតំបន់ភាគខាងជើងប្រទេសឥណ្ឌា រួមទាំងរដ្ឋធានីញូវដែលីរបស់ខ្លួននៅថ្ងៃពុធ (១៥ មករា) នេះ។

ការិយាល័យអាកាសធាតុឥណ្ឌា បានចេញការជូនដំណឹងពណ៌លឿងទុំសម្រាប់ទីក្រុងដេលី ដែលជាកម្រិតព្រមានខ្ពស់បំផុតទីពីរ ដោយព្យាករថានឹងមានអ័ព្ទក្រាស់ធម្មតា ដល់កម្រិតក្រាស់ខ្លាំង នៅក្នុងតំបន់ជាច្រើន។

ការិយាល័យអាកាសធាតុនិយាយថា កម្រិតនៃភាពមើលឃើញនៅអាកាសយានដ្ឋានសំខាន់របស់ទីក្រុងដេលី គឺស្ថិតនៅចន្លោះពីសូន្យដល់ ១០០ម៉ែត្រហើយរថភ្លើងជាង ៤០ខ្សែ នៅទូទាំងភាគខាងជើងឥណ្ឌា ត្រូវបានពន្យារពេលដោយសារតែអ័ព្ទ។

ក្រុមអាជ្ញាធរព្រលានយន្តហោះបាននិយាយលើបណ្ដាញសង្គម X ថា ការចេញដំណើររបស់យន្តហោះមួយចំនួនពីក្រុងដេលី ត្រូវបានពន្យារពេល ដោយព្រមានថា ជើងហោះហើរដែលខ្វះប្រព័ន្ធចុះចត CAT III នឹងជួបការលំបាក។ អាកាសយានដ្ឋានសំខាន់របស់ក្រុងដេលីនេះគ្រប់គ្រងជើងហោះហើរប្រហែល ១.៤០០ជើង ជារៀងរាល់ថ្ងៃ។

ប្រព័ន្ធផ្សព្វផ្សាយក្នុងស្រុកបានបង្ហាញពីរូបភាពនៃយានជំនិះដែលធ្វើដំណើរតាមដងវិថីឆ្លងកាត់អ័ព្ទ ហើយមនុស្សម្នាបានសម្ងំក្នុងផ្ទះ ខណៈសីតុណ្ហភាពធ្លាក់ចុះដល់ ៧អង្សាសេ។ ទីក្រុងដេលី ត្រូវបានចាត់ចំណាត់ថ្នាក់ជាទីក្រុងមានការបំពុល ឬកង្វក់ខ្យល់ខ្លាំងបំផុតក្នុងពិភពលោក ក្នុងការចាត់ថ្នាក់ដោយក្រុមស្វីស IQAir នៅថ្ងៃពុធនេះ ដោយគុណភាពខ្យល់នៅកម្រិត ២៥៤ ដែលចាត់ថ្នាក់ថា "គ្រោះថ្នាក់ដល់សុខភាព"៕