កងទ័ពជើងទឹកប៉ាគីស្ថាន បាននិយាយកាលពីថ្ងៃអង្គារថា ខ្លួនបានអញ្ជើញប្រទេសជាង ១០០ មកចូលរួមធ្វើសមយុទ្ធដែនសមុទ្រ AMAN ដែលធ្វើឡើងរៀងរាល់ពីរឆ្នាំម្តង ដោយមានការចូលរួមពីនាវា យន្តហោះ និងកងកម្លាំងប្រតិបត្តិការពិសេស ចាប់ពីថ្ងៃទី ០៧ ដល់ថ្ងៃទី ១១ ខែកុម្ភៈ ដោយព្រឹត្តិការណ៍នេះ រួមមានទាំងការសន្ទនាសម្រាប់មេដឹកនាំកងទ័ពជើងទឹកជាន់ខ្ពស់ ជាលើកដំបូង។

កងទ័ពជើងទឹកប៉ាគីស្ថាន បានធ្វើសមយុទ្ធដែនសមុទ្រ AMAN រៀងរាល់ពីរឆ្នាំម្តង ចាប់តាំងពីឆ្នាំ ២០០៧ ក្រោមប្រធានបទ «រួមគ្នាដើម្បីសន្តិភាព»។ លក្ខណៈពិសេសរបស់សមយុទ្ធឆ្នាំនេះ គឺមានកិច្ចសន្ទនាអំពីដែនសមុទ្រ AMAN (AMAN Dialogue)ជាលើកដំបូង ក្រោមប្រធានបទ «សមុទ្រមានសុវត្ថិភាព អនាគតរុងរឿង» ដោយផ្តោតលើបញ្ហាប្រឈមផ្នែកសន្តិសុខ នៅក្នុងមហាសមុទ្រឥណ្ឌា រួមមានការប្រកួតប្រជែងជាយុទ្ធសាស្ត្រ អំពើចោរកម្មតាមសមុទ្រ ការជួញដូរគ្រឿងញៀន តួអង្គមិនមែនរដ្ឋ ការកេងប្រវ័ញ្ចធនធាន ការប្រែប្រួលអាកាសធាតុ បច្ចេកវិទ្យានានាដែលកំពុងកើតឡើងដូចជា បញ្ញាសិប្បនិមិ្មត (AI) និងប្រព័ន្ធគ្មានមនុស្សបើក ការប្រើប្រាស់ធនធានសមុទ្រប្រកបដោយចីរភាព ដើម្បីកំណើនសេដ្ឋកិច្ច និងតម្រូវការសម្រាប់ការសហការជាសកល ដើម្បីធានាស្ថិរភាព និងវិបុលភាព។

លោកឧត្តមសេនីយ៍ត្រីទាហានជើងទឹក Ahmed Hussain អគ្គនាយកទំនាក់ទំនងសាធារណៈនៃកងទ័ពជើងទឹកប៉ាគីស្ថាន បាននិយាយនៅក្នុងសេចក្តីថ្លែងការណ៍ជាលាយលក្ខណ៍អក្សរ ដែលបានចែករំលែកជាមួយអ្នកយកព័ត៌មាន នៅក្នុងសន្និសីទកាសែតមួយ កាលពីថ្ងៃអង្គារថា៖«ចាប់តាំងពីការចាប់ផ្តើមរបស់ខ្លួន ការចូលរួមសមយុទ្ធដែនសមុទ្រ AMAN បានកើនឡើងជាលំដាប់ ដោយលើកទី ៨ ក្នុងឆ្នាំ ២០២៣ ធ្វើជាម្ចាស់ផ្ទះទទួលប្រទេសចំនួន ៥០ ដែលជាចំនួនច្រើនបំផុតមិនធ្លាប់មាន ហើយឆ្នាំនេះ យើងរំពឹងថា នឹងមានច្រើនជាងនេះទៅទៀត ដោយសារប្រទេសជាង១០០ ត្រូវបានអញ្ជើញឲ្យចូលរួមសមយុទ្ធលើក   ទី៩ ដែលគ្រោងនឹងធ្វើឡើង ពីថ្ងៃទី ០៧ ដល់ថ្ងៃទី ១១ ខែកុម្ភៈ»។