​ប្រណាំង​រថយន្ត៖ ​កីឡាករ​ប្រណាំង​រថយន្ត F1 ហូ​ឡង់ Max Verstappen ដណ្តើមបាន​ជ័យជំនះ​ការប្រកួត​នៅ​ទឹកដី​ម៉ិ​ក​ស៊ិ​កនៅ​ថ្ងៃអាទិត្យ​ម្សិលមិញ​នេះ​ ដើម្បី​ពន្លាត​ការ​នាំមុខ​ក្នុង​តារាង​ជើងឯក​ពិភពលោក​។ ​​ក្រោយ​ការប្រណាំង​យក​ទី​ចេញដំណើរ​កាលពី​ថ្ងៃ​សៅរ៍​ កីឡាករ​របស់ Mercedes ទាំងពីរ​នាក់ Valtteri Bottas និង Lewis Hamilton គឺជា​អ្នក​ចេញដំណើរ​ជួរ​មុខ តែ​ពេលចេញ​ដំណើរ​ជាក់ស្តែង​នៅ​ថ្ងៃអាទិត្យ​កីឡាករ​របស់ Red Bull, Max Verstappen ចេញដំណើរ​បាន​យ៉ាង​ល្អវ៉ា​ផុត​កីឡាករ​របស់ Mercedes ទាំងពីរ​ឡើងមក​នាំមុខ​នាំមុខ​។

​​Vatteri Bottas ចេញ​ឈ្នះ​ការប្រកួត​យក​ទី​ចេញដំណើរ​នោះ​ចាប់ផ្តើម​មិនបាន​ល្អ​ឡើយ​ ក្រោយ​ប៉ះទង្គិច​គ្នា​ពេល​ផ្លូវបត់​ទី១ និង​បញ្ចប់​ការប្រកួត​នៅ​ចំណាត់ថ្នាក់​លេខ ១៥ ឯណោះ​។ ​​តាម​ពីក្រោយ Verstappen គឺជា​ជើងឯក ៧សម័យ Lewis Hamilton ខណៈ​លេខ៣ កីឡាករ​ម្ចាស់ផ្ទះ​ម៉ិ​ក​ស៊ិ​ក Sergio Perez របស់ Red Bull, លេខ៤ កីឡាករ​បារាំង Pierre Gasly របស់​ក្រុម Alpha Tauri, លេខ៥ និង​លេខ៦ ជា​កីឡាករ​របស់ Ferrari ទាំងពីរ Charles Leclerc និង Carlos Sainz​។ ​​ក្រោយ​ជ័យជំនះ​នៅ​ម៉ិ​ក​ស៊ិ​ក​នេះ Max Verstappen បាន​ពន្លាត​ការនាំ​មុខ​ក្នុង​តារាង​ជើងឯក​ពិភពលោក​ដល់ ១៩ពិន្ទុ ​ខណៈ​ការប្រកួត​នៅសល់ ៤ទីលាន​ទៀត​បញ្ចប់​រដូវ​កាល​។ ​ទីលាន​បន្ទាប់​គឺ F1 នឹង​បន្តដំណើរ​ទៅ​ប្រទេស​ប្រេ​ស៊ី​ល​ចុង​សប្តាហ៍​នេះ​៕

​អត្ថបទ​៖​នាង សុភា​វុ​ធ