បណ្ដាញសង្គម TikTok កាលពីថ្ងៃអង្គារ (ទី១៤ ខែមករា) បានចាត់ទុកថា ជាសេចក្ដីរាយការណ៍ «ប្រឌិតសុទ្ធសាធ» ដែលថា ប្រទេសចិនកំពុងស្វែងរកលទ្ធភាពលក់នូវប្រតិបត្តិការរបស់វេទិកាចែករំលែកវីដេអូ នៅសហរដ្ឋអាមេរិក ទៅឲ្យមហាសេដ្ឋី លោក Elon Musk ខណៈដែលក្រុមហ៊ុនប្រឈមនឹងច្បាប់របស់អាមេរិកដែលទាមទារឲ្យផ្ដាច់ខ្លួនពីប្រទេសចិន។

គួរបញ្ជាក់ថា ដោយដកស្រង់សម្ដីពីបុគ្គលមិនបញ្ចេញឈ្មោះដែលដឹងពីបញ្ហានេះ សារព័ត៌មាន Bloomberg News មុននេះ បានរាយការណ៍ថា មន្ត្រីចិនកំពុងពិចារណាលក់ប្រតិបត្តិការនៅសហរដ្ឋអាមេរិករបស់ក្រុមហ៊ុន ទៅឲ្យបណ្ដាញសង្គម X របស់លោក Musk។

សេចក្ដីរាយការណ៍នេះបានគូសបញ្ជាក់ពីសេណារីយ៉ូមួយ ដែលកំពុងត្រូវបានពិភាក្សា នៅទីក្រុងប៉េកាំង ដែលបណ្ដាញសង្គម X នឹងទិញ TikTok ពីម្ចាស់ជនជាតិចិន គឺក្រុមហ៊ុន ByteDance ហើយបញ្ចូលវាជាមួយវេទិកាដែលពីមុនត្រូវបានគេស្គាល់ថា Twitter។

យ៉ាងណាក្ដី ក្រោយមានការចុះផ្សាយពីលទ្ធភាពនៃការលក់ដូរនេះ អ្នកនាំពាក្យរបស់បណ្ដាញសង្គម TikTok បានប្រាប់សារព័ត៌មាន AFP ខ្លីៗថា៖ «យើងមិនអាចធ្វើអត្ថាធិប្បាយ ពាក់ព័ន្ធនឹងរឿងប្រឌិតឡើងសុទ្ធសាធនោះទេ»។

សេចក្ដីរាយការណ៍នោះ បានប៉ាន់ប្រមាណតម្លៃប្រតិបត្តិការរបស់ TikTok នៅសហរដ្ឋអាមេរិក មានចន្លោះពី ៤០ពាន់លានដុល្លារអាមេរិក និង ៥០ពាន់លានដុល្លារអាមេរិក។

គួររំលឹកថា សភាសហរដ្ឋអាមេរិកបានអនុម័តច្បាប់កាលពីឆ្នាំមុន ដែលតម្រូវឲ្យក្រុមហ៊ុន ByteDance លក់វេទិកាដ៏ពេញនិយមរបស់ខ្លួន ឬបើមិនដូច្នោះទេ ត្រូវបិទដំណើរការតែម្ដង។ ការកំណត់នោះចូលជាធរមាននៅថ្ងៃទី១៩ ខែមករា ពោលមួយថ្ងៃមុនពេលប្រធានាធិបតីជាប់ឆ្នោតលោក Donald Trump ចូលកាន់តំណែង៕