នៅក្នុងបទសម្ភាសន៍ជាមួយប្រព័ន្ធផ្សព្វផ្សាយ NBC News កាលពីថ្ងៃអង្គារ (ទី១៤ ខែមករា) ដោយបដិសេធការអះអាងកន្លងមកទាំងពីលោក Donald Trump និងរដ្ឋាភិបាលអាមេរិក ប្រធានាធិបតីអ៊ីរ៉ង់ លោក Masoud Pezeshkian បាននិយាយថា អ៊ីរ៉ង់មិនដែលមានគ្រោងសម្លាប់ប្រធានាធិបតីជាប់ឆ្នោតរបស់សហរដ្ឋអាមេរិករូបនេះ។

នៅខែវិច្ឆិកា ឆ្នាំ២០២៤ ក្រសួងយុត្តិធម៌អាមេរិកបានចោទប្រកាន់បុរសជនជាតិអ៊ីរ៉ង់ម្នាក់ ពាក់ព័ន្ធនឹងការចោទប្រកាន់ថា មានគម្រោងបញ្ជាដោយកងឆ្មាំបដិវត្តន៍ឥស្សរជនអ៊ីរ៉ង់ ធ្វើឃាតលោក Trump។ អង្គភាពអនុវត្តច្បាប់ បានរារាំងផែនការដែលត្រូវបានចោទប្រកាន់នោះ មុនពេលការវាយប្រហារណាមួយ ត្រូវបានអនុវត្ត។

ហើយលោក Trump ក៏បាននិយាយកាលពីឆ្នាំមុនក្នុងអំឡុងពេលធ្វើយុទ្ធនាការបោះឆ្នោតអាមេរិកថា អ៊ីរ៉ង់ប្រហែលជានៅពីក្រោយការប៉ុនប៉ងសម្លាប់រូបលោក។

យ៉ាងណាក្ដី លោក Pezeshkian បាននិយាយតាមប្រព័ន្ធផ្សព្វផ្សាយ NBC News ថា៖ «មិនមានអ្វីទាំងអស់។ យើងមិនដែលប៉ុនប៉ងចាប់ផ្តើមរឿងបែបនេះឡើយ ហើយយើងក៏នឹងគ្មានថ្ងៃធ្វើដូច្នេះដែរ»។

គួររំលឹកថា លោក Trump ដែលបានឈ្នះការបោះឆ្នោតអាមេរិកឆ្នាំ២០២៤ ហើយនឹងត្រូវចូលកាន់តំណែងនៅថ្ងៃទី២០ ខែមករា បានរួចផុតពីការប៉ុនប៉ងធ្វើឃាតចំនួន ២លើក ក្នុងអំឡុងពេលធ្វើយុទ្ធនាការ។ មួយលើកកើតមានក្នុងខែកញ្ញា ឆ្នាំ២០២៤ ខណៈពេលដែលរូបលោកកំពុងវាយកូនហ្គោលនៅរដ្ឋ Florida និងមួយទៀតក្នុងអំឡុងពេលជួបជុំ ក្នុងខែកក្កដា ឆ្នាំ២០២៤ នៅរដ្ឋ Pennsylvania។ ក្រុមអ្នកស៊ើបអង្កេតមិនបានរកឃើញភស្តុតាងណាមួយពីការជាប់ពាក់ព័ន្ធរបស់អ៊ីរ៉ង់ ក្នុងករណីទាំងនោះទេ៕