ក្រុមអ្នកស៊ើបអង្កេតនៅតែកំពុងធ្វើការ ដើម្បីកំណត់ពីមូលហេតុអ្វីដែលបណ្តាលឲ្យមានចំហេះរាលដាលដែលបានឆាបឆេះ នៅជុំវិញទីក្រុង Los Angeles កាលពីសប្តាហ៍មុន ប៉ុន្តែអ្នកស្រុកមានការព្រួយបារម្ភថា ហេដ្ឋារចនាសម្ព័ន្ធអគ្គិសនី អាចជាដើមហេតុយ៉ាងហោចណាស់មួយ ក្នុងចំណោមអគ្គិភ័យទាំងនោះ។

បើយោងតាមទិន្នន័យពីទីភ្នាក់ងារការពារព្រៃឈើរបស់សហរដ្ឋអាមេរិក បានបង្ហាញថា គិតចាប់តាំងពីឆ្នាំ១៩៩២ មក ចំហេះព្រៃជាង ៣.៦០០ដង នៅរដ្ឋ California មានពាក់ព័ន្ធនឹងការផលិត ការបញ្ជូន និងការចែកចាយថាមពល។ អគ្គិភ័យដែលបំផ្លិចបំផ្លាញខ្លាំងបំផុតមួយចំនួន ត្រូវបានរកឃើញដានបង្កឡើងដោយសារបញ្ហាបង្គោលភ្លើង និងបណ្ដាញខ្សែភ្លើង។

ទីភ្នាក់ងារ CalFire (ស្ថាប័នគ្រប់គ្រងព្រៃឈើ និងអគ្គិភ័យរដ្ឋ California) បញ្ចេញទិន្នន័យ ស្តីពីចំហេះព្រៃធំៗកាលពីអតីតកាល ហើយកំណត់មូលហេតុរបស់វា នៅក្នុងប្រភេទផ្សេងៗគ្នា ដែលអាចជាការកើតឡើងដោយសារកត្តាធម្មជាតិ និងស្នាដៃមនុស្ស ដូចជារន្ទះ ឬការដុតជាដើម។

ទីភ្នាក់ងារនេះបានចុះបញ្ជីអគ្គិភ័យជាង ១២.៥០០លើក ចាប់តាំងពីចុងទសវត្សរ៍ឆ្នាំ១៨០០ ទោះបីជាមូលហេតុជាងពាក់កណ្តាល មិនត្រូវបានដឹង ឬមិនអាចកំណត់បានក៏ដោយ។

រន្ទះ និងការប្រើប្រាស់ឧបករណ៍ គឺស្ថិតក្នុងចំណោមមូលហេតុដែលគេដឹងច្រើនបំផុត។ ប៉ុន្តែក្នុងរយៈពេលប៉ុន្មានទសវត្សរ៍កន្លងមកនេះ ចំណែកបង្កអគ្គិភ័យដែលត្រូវបានគេដឹងថា បណ្តាលមកពីហេដ្ឋារចនាសម្ព័ន្ធថាមពល បានកើនឡើងនៅទូទាំងរដ្ឋនេះ៕