រដ្ឋមន្ត្រីអភិវឌ្ឍន៍របស់ប្រទេសអាល្លឺម៉ង់លោកស្រី Svenja Schulze បានសន្យាថា នឹងគាំទ្រដល់ «ការអភិវឌ្ឍប្រកបដោយសន្តិភាព និងស្ថិរភាព» របស់ប្រទេសស៊ីរី ខណៈលោកស្រី បានធ្វើទស្សនកិច្ច នៅក្រុងដាម៉ាស នៅថ្ងៃពុធនេះ ដើម្បីជួបជាមួយអាជ្ញាធរបណ្ដោះអាសន្នរបស់ប្រទេសនេះ។

លោកស្រី Schulze បាននិយាយនៅក្នុងសេចក្តីថ្លែងការណ៍មួយថា៖«បន្ទាប់ពីរយៈពេលជាង ៥០ឆ្នាំនៃរបបផ្តាច់ការ និង ១៤ឆ្នាំនៃសង្រ្គាមស៊ីវិល ឥឡូវនេះ ប្រទេសស៊ីរីមានឱកាសអភិវឌ្ឍន៍ដោយសន្តិភាព និងស្ថិរភាព»។

ដំណើរទស្សនកិច្ចរបស់លោកស្រី កើតឡើង ក្នុងរយៈពេលមួយខែ បន្ទាប់ពីកងកម្លាំងដឹកនាំដោយក្រុម ឥស្លាមនិយម បានផ្តួលរំលំប្រធានាធិបតីកាន់តែតំណែងដ៏យូរគឺ លោក បាសា អាល់អាសាដ (Bashar al-Assad)។

សេចក្តីថ្លែងការណ៍របស់រដ្ឋមន្ត្រីរូបនេះ បានបញ្ជាក់ថា លោកស្រី នឹងជួបជាមួយថ្នាក់ដឹកនាំថ្មី ក៏ដូចជាអង្គការជំនួយ ដើម្បីកំណត់ពីរបៀបដែលអាល្លឺម៉ង់ អាចគាំទ្រដល់ការអភិវឌ្ឍប្រទេសស៊ីរីប្រកបដោយសន្តិភាព ស្ថិរភាព និងបរិយាប័ន្ន។