អង្គភាពសារព័ត៌មាន Tasnim ពាក់កណ្តាលផ្លូវការ បានរាយការណ៍ថា កងទ័ពជើងទឹករបស់អ៊ីរ៉ង់ បានទទួលនាវាស៊ើបការណ៍ចាប់សញ្ញាអេឡិចត្រូនិចរបស់ខ្លួន ជាលើកដំបូង នៅថ្ងៃពុធនេះ រយៈពេលប៉ុន្មានថ្ងៃបន្ទាប់ពីកងទ័ពរបស់ប្រទេសនេះ បានទទួលយានដ្រូនថ្មីចំនួន ១.០០០ គ្រឿង។

សារព័ត៌មាន Tasnim បានបញ្ជាក់ថា នាវា Zagros គឺជាប្រភេទថ្មីនៃនាវាយោធាដែលបំពាក់ដោយឧបករណ៍ចាប់សញ្ញាអេឡិចត្រូនិច និងមានសមត្ថភាព ក្នុងការស្ទាក់ចាប់ប្រតិបត្តិការតាមអ៊ីនធឺណិត និងធ្វើការត្រួតពិនិត្យស៊ើបការណ៍សម្ងាត់។

មេបញ្ជាការកងទ័ពជើងទឹកលោក Shahram Irani បាននិយាយថា៖«នាវា Zagros ផ្តល់សញ្ញាថា នាវាស៊ើបការណ៍ នឹងក្លាយជាអ្នកឃ្លាំមើលរបស់កងទ័ពជើងទឹកអ៊ីរ៉ង់ នៅក្នុងសមុទ្រ និងមហាសមុទ្រ»។

កាលពីដើមខែនេះ អ៊ីរ៉ង់បានចាប់ផ្តើមសមយុទ្ធយោធារយៈពេលពីរខែ ដែលរួមបញ្ចូលល្បែងសង្គ្រាមរួចហើយ ដែលក្នុងនោះ កងឆ្មាំបដិវត្តន៍សម្រាំង បានការពារការដំឡើងនុយក្លេអ៊ែរសំខាន់ៗនៅ Natanz ប្រឆាំងនឹងការវាយប្រហារក្លែងក្លាយដោយមីស៊ីល និងយានដ្រូន។

សមយុទ្ធយោធា និងការផ្គត់ផ្គង់គ្រឿងយុទ្ធោបករណ៍ កើតឡើង នៅពេលមានភាពតានតឹងខ្លាំងជាមួយអ៊ីស្រាអែលដែលជាសត្រូវ និងសហរដ្ឋអាមេរិក ក្រោមការគ្រប់គ្រងរបស់ប្រធានាធិបតីអាមេរិកលោក Donald Trump ដែលជិតចូលមកដល់ហើយនោះ។

កាលពីខែតុលា អ្នកនាំពាក្យរដ្ឋាភិបាលអ៊ីរ៉ង់ បាននិយាយថា ប្រទេសនេះ គ្រោងនឹងបង្កើនថវិកាយោធារបស់ខ្លួនប្រហែល ២០០ភាគរយ ដើម្បីទប់ទល់នឹងការគំរាមកំហែងកាន់តែខ្លាំងឡើង។