ក្រុមមន្រ្តី និយាយនៅថ្ងៃពុធនេះថា មនុស្សរាប់ពាន់នាក់រស់នៅលើកោះ Halmahera នឹងត្រូវជម្លៀសខ្លួនចេញ ក្រោយភ្នំភ្លើង Ibu បានផ្ទុះនៅតំបន់ភាគខាងកើតប្រទេសឥណ្ឌូនេស៊ី ដោយព្រួសសំណុំផ្សែង និងផេះ ចូលទៅក្នុងបរិយាកាស ។

ភ្នំភ្លើង Ibu ស្ថិតនៅលើកោះដាច់ស្រយាល Halmahera បានផ្ទុះជាលើកទី ៥ក្នុងឆ្នាំនេះ ធ្វើឲ្យសំណុំផ្សែងហោះលើផ្ទៃអាកាសកម្ពស់ ៤គ.ម ។

ស្ថានការប្រកាសអាសន្នរបស់ភ្នំភ្លើង ត្រូវបានដំឡើងដល់កម្រិតខ្ពស់បំផុតដោយទីភ្នាក់ងារភូគព្ភសាស្ត្រឥណ្ឌូនេស៊ី ។

លោក Wawan Gunawan Ali គឺជាប្រធានមន្ទីរគ្រប់គ្រងគ្រោះមហន្តរាយក្នុងស្រុក និយាយថា បន្ទាប់ពីការបង្កើនកម្រិតប្រកាសអាសន្នរបស់ភ្នំភ្លើង Ibu នៅថ្ងៃពុធនេះ ពួកយើងនឹងជម្លៀសអ្នកស្រុកចេញពីភូមិចំនួន ៥ ។

លោកបន្តថា ក្រុមអាជ្ញាធរក្នុងស្រុក មានគម្រោងជម្លៀសអ្នកស្រុកប្រមាណជា ៣ពាន់នាក់ចេញពីភូមិក្បែរនោះ នៅល្ងាចថ្ងៃពុធនេះ ។

សូមបញ្ជាក់ថា ភ្នំភ្លើង Ibu បានបង្ហាញការកម្រើកខ្លាំងចាប់តាំងពីខែមិថុនា ឆ្នាំមុនរហូតមក បន្ទាប់ពីកើតមានការរញ្ជួយដីជាបន្តបន្ទាប់ ៕