ស៊ីហ្គេម៖ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) កាលពីថ្មីៗបានដឹកនាំមន្ត្រីជំនាញចុះសួរសុខទុក្ខ និងពិនិត្យទីតាំងប្រមូលផ្ដុំហ្វឹកហាត់របស់កីឡា ២ប្រភេទនៅមជ្ឈមណ្ឌលកីឡាកងយោធពលខេមរភូមិន្ទ (ស្ដាតចាស់) គឺកីឡាប្រដាល់គុនខ្មែរ និងប្រដាល់ឃីកបុកស៊ីង ដោយលោកបានធ្វើការវាយតម្លៃខ្ពស់ចំពោះទីតាំងបិទខ្ទប់ហ្វឹកហាត់ប្រភេទកីឡាប្រយុទ្ធទាំងពីរ។
ឯកឧត្តម វ៉ា់ត់ ចំរើន បានគូសបញ្ជាក់ថា មជ្ឈមណ្ឌលកីឡាកងយោធពលខេមរភូមិន្ទគឺជាទីតាំងមានអំណោយផលល្អមួយ សម្រាប់ប្រមូលផ្ដុំហ្វឹកហាត់ក្រុមជម្រើសជាតិប្រដាល់គុនខ្មែរ និងកីឡាប្រដាល់ឃីកបុកស៊ីងកម្ពុជា ទាំងការស្នាក់នៅ កន្លែងហូបចុក និងទីលានហ្វឹកហាត់គឺស័ក្ដិសមនឹងកីឡាទាំងពីរប្រភេទ។ លើសពីនេះក្នុងនាម CAMSOC ឯកឧត្តមក៏បានធ្វើការជំរុញនឹងនាំយកគ្រូបង្វឹកកម្រិតខ្ពស់ពីប្រទេសចិន ដើម្បីមកបង្ហាញបច្ចេកទេសដល់កីឡាឃីកបុកស៊ីងដែលជាប្រភេទកីឡាថ្មីទើបបង្កើតផងដែរ។
រដ្ឋលេខាធិការក្រសួងទេសចរណ៍ដដែលបន្ដថា ទាំងអស់នេះគឺជាកិច្ចការដ៏សំខាន់ដែលគណៈកម្មាធិការជាតិ CAMSOC កំពុងធ្វើការយ៉ាងសស្រាក់សស្រាំជាមួយក្រសួងអប់រំ យុវជន និងកីឡា ពិសេសសហព័ន្ធកីឡាជាតិ ទាំងសម្រួចសមត្ថភាព បច្ចេកទេស និងទិសដៅឆ្ពោះទៅព្រឹត្តិការណ៍ស៊ីហ្គេមចំពោះមុខ គឺការប្រកួតកីឡាស៊ីហ្គេមលើកទី៣១ នៅប្រទេសវៀតណាមនាឆ្នាំ២០២២ ខាងមុខ និងស៊ីហ្គេម លើកទី៣២ នៅកម្ពុជានាឆ្នាំ២០២៣។ ដូច្នេះឯកឧត្តមរំពឹងថា កីឡាករ-កីឡាការិនីទាំងអស់នឹងយកឱកាសនេះ ខិតខំប្រឹងប្រែងហ្វឹកហាត់ដើម្បីឈានទៅដណ្ដើមមេដាយជូនជាតិឲ្យបាន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
