នាយករដ្ឋមន្ត្រីប៉ាឡេស្ទីន លោក Mohammad Mustafa នៅថ្ងៃពុធ (ទី១៥ ខែមករា) នេះ បាននិយាយថា អាជ្ញាធរប៉ាឡេស្ទីន (PA) ត្រូវតែអ្នកគ្រប់គ្រងតែមួយគត់ នៅតំបន់ហ្កាហ្សា បន្ទាប់ពីបញ្ចប់សង្គ្រាម ខណៈដែលការរំពឹងទុកមានកាន់តែខ្លាំងឡើងៗ ដែលថា កិច្ចព្រមព្រៀងបញ្ឈប់ការប្រយុទ្ធ និងចាប់ផ្តើមបញ្ជូនចំណាប់ថ្នូរអ៊ីស្រាអែលត្រលប់មកវិញ ជិតកើតឡើងហើយ។

អ្នកណានឹងគ្រប់គ្រងតំបន់ហ្កាហ្សា ក្រោយសង្រ្គាម នៅតែជាសំណួរគ្មានចម្លើយដ៏ធំមួយ នៅក្នុងការចរចានានា ដែលបានផ្តោតលើបទឈប់បាញ់បន្ទាន់ និងការដោះដូរចំណាប់ថ្នូរដែលនៅតែជាប់ឃុំខ្លួនក្នុងដែនដីនេះ ជាមួយអ្នកទោសប៉ាឡេស្ទីននៅក្នុងពន្ធនាគាររបស់អ៊ីស្រាអែល។

ដោយថ្លែងនៅឯសន្និសីទមួយ ក្នុងប្រទេសន័រវ៉ែស លោក Mustafa បាននិយាយថា សម្ពាធត្រូវតែបន្តមាន ដើម្បីមានការព្រមព្រៀងលើបទឈប់បាញ់ នៅតំបន់ហ្កាហ្សា និងអនុញ្ញាតឲ្យមានជំនួយមនុស្សធម៌បន្ថែមទៀត សម្រាប់មនុស្សជាង ២លាននាក់ ដែលកំពុងប្រឈមនឹងវិបត្តិមនុស្សធម៌ធ្ងន់ធ្ងរ បន្ទាប់ពីមានសង្គ្រាមរយៈពេល ១៥ខែ។

ហើយលោកបានសង្កត់ធ្ងន់ថា មានតែអាជ្ញាធរប៉ាឡេស្ទីនប៉ុណ្ណោះ ដែលត្រូវបានដាក់ឲ្យគ្រប់គ្រងស្របច្បាប់ នៅតំបន់ហ្កាហ្សាស្ទ្រីប បន្ទាប់ពីការប្រយុទ្ធគ្នាបានបញ្ចប់ ហើយមិនគួរមានការប៉ុនប៉ងបំបែកតំបន់ហ្កាហ្សាចេញពីតំបន់កាន់កាប់ West Bank ដែលជាផ្នែកនៃរដ្ឋប៉ាឡេស្ទីននោះឡើយ។

អ៊ីស្រាអែល បានច្រានចោលការជាប់ពាក់ព័ន្ធណាមួយដោយក្រុមហាម៉ាស់ដែលគ្រប់គ្រងតំបន់ហ្កាហ្សា នៅមុនសង្រ្គាម ប៉ុន្តែប្រទេសនេះ ក៏ស្ទើរតែជំទាស់ទាំងស្រុងដែរ ចំពោះគំនិតឲ្យមានការគ្រប់គ្រងដោយអាជ្ញាធរប៉ាឡេស្ទីន ដែលជាស្ថាប័នត្រូវបានបង្កើតឡើងក្រោមកិច្ចព្រមព្រៀងសន្តិភាពបណ្តោះអាសន្នអូស្លូកាលពី ៣ទសវត្សរ៍មុន។ អាជ្ញាធរនេះមានអំណាចដោយមានកម្រិត នៅតំបន់ West Bank៕