ប្រទេសចិន និងស្រីលង្កា បានព្រមព្រៀងគ្នា លើការវិនិយោគ និងកិច្ចសហប្រតិបត្តិការសេដ្ឋកិច្ចបន្ថែមទៀត បន្ទាប់ពីប្រធានាធិបតីចិន លោក ស៊ី ជីនពីង (Xi Jinping) បានជួបជាមួយប្រធានាធិបតីជាប់ឆ្នោតថ្មីៗរបស់ស្រីលង្កា គឺលោក Anura Kumara Dissanayake នៅទីក្រុងប៉េកាំង នាថ្ងៃពុធ (ទី១៥ ខែមករា) នេះ។

ប្រទេសទាំង២ បានចុះហត្ថលេខាលើឯកសារកិច្ចសហប្រតិបត្តិការសរុបចំនួន ១៥ ក្នុងនោះរួមទាំងកិច្ចព្រមព្រៀងសហប្រតិបត្តិការលើការអភិវឌ្ឍសេដ្ឋកិច្ច និងបច្ចេកវិទ្យា និងការធ្វើឲ្យស្របគ្នា រវាង «គំនិតផ្តួចផ្តើមខ្សែក្រវាត់ និងផ្លូវ» របស់ប្រទេសចិន ជាមួយនឹងប្លង់មេសេដ្ឋកិច្ចឌីជីថលឆ្នាំ២០៣០ របស់ប្រទេសស្រីលង្កា។ យ៉ាងណាក្ដី ព័ត៌មានលម្អិតនៃកិច្ចព្រមព្រៀងមិនត្រូវបានបង្ហាញ នៅក្នុងពិធីចុះហត្ថលេខានោះទេ។

ដំណើរទស្សនកិច្ចរបស់លោក Dissanayake ទៅកាន់ប្រទេសអ្នកផ្តល់ប្រាក់កម្ចីទ្វេភាគីដ៏ធំបំផុតរបស់ប្រទេសលោក បានកើតឡើងបន្ទាប់ពីបានធ្វើដំណើរលើកដំបូងទៅកាន់ប្រទេសឥណ្ឌាដែលជាគូប្រជែងក្នុងតំបន់។

គួរបញ្ជាក់ថា ទីក្រុងកូឡុំបូ (ស្រីលង្កា) បានឈានដល់កិច្ចព្រមព្រៀងសំខាន់ៗចំនួន២ ដោយមួយនៅក្នុងខែមិថុនាឆ្នាំមុន ដើម្បីរៀបចំឡើងវិញនូវបំណុលទ្វេភាគីចំនួន ១០ពាន់លានដុល្លារជាមួយប្រទេសធំៗ ដូចជាចិន ជប៉ុន និងឥណ្ឌា និងមួយទៀត នៅក្នុងខែធ្នូ ដើម្បីទូទាត់ជាមួយម្ចាស់ប័ណ្ណបំណុលចំនួន ១២,៥ពាន់លានដុល្លារ៕