​ស្នូកឃ័រ៖ ​កីឡាករ​ស្នូកឃ័រ​អូស្ត្រាលី Neil Robertson បាន​ក្លាយជា​ជើងឯក​ការប្រកួត​ស្នូកឃ័រ​ពានរង្វាន់ English Open ក្រោយ​យកឈ្នះកីឡាករ​ជើងចាស់ John Higgins ៩-៨ហ្វ្រេ​ម​នៅ​វគ្គ​ផ្តាច់ព្រ័ត្រ​។ ​​Robertson បាន​នាំមុខ​ការប្រកួត ៥-៣ហ្វ្រេ​ម​ក្រោយ​បញ្ចប់​ដំណាក់កាល​ដំបូង​តែ​ក្រោយមក John Higgins ក៏​វាយបក​ពីក្រោយ ៤ហ្វ្រេ​ម​ផ្ទួនៗ​ដើម្បី​នាំមុខ ៧-៥ វិញ​។

​​ការប្រកួត​ដ៏​ស្វិត​ស្វាយ​រវាង​កីឡាករ​ទាំង​២ បាន​ដេញ​គ្នា​ទៅវិញទៅមក​ ខណៈ Robertson ក៏បាន​វាយបក​ពី​ការ​នាំមុខ​របស់ John Higgins រហូតមក​ស្មើ​វិញ ៨-៨ អូសបន្លាយ​ដល់​ហ្វ្រេ​ម​កាត់សេចក្តី​។ ​​Robertson ធ្វើបាន​ល្អ​ជាង​នៅ​ហ្វ្រេ​ម​ចុង​ក្រោយនេះ​ដោយ​ធ្វើបាន ៦៥ពិន្ទុ​ក្នុង​មួយ​ឈើ​គ្រប់គ្រាន់​ល្មម​ដើម្បី​គ្រង​ជើងឯក​។ ​​សូមបញ្ជាក់ថា ​នេះ​ជា​ពាន English Open លើកដំបូង​សំរាប់ Neil Robertson បន្ទាប់ពី​ឆ្នាំមុន​បាន​ត្រឹម​ជើងឯក​រង​ក្រោយ​ចាញ់ Judd Trump នៅ​វគ្គ​ផ្តាច់ព្រ័ត្រ​។ ​ស្នូកឃ័រ English Open ត្រូវបាន​បង្កើតឡើង​នៅ​ឆ្នាំ២០១៦ ដោយ​អ្នកឈ្នះ​ដំបូង​គឺ​កីឡាករ​ចិន Liang Wenbo ក្រោយមក​ជើងឯក​សុទ្ធតែជា​កីឡាករ​អង់គ្លេស​រួមមាន Ronnie O’Sullivan, Stuart Bingham, Mark Selby និង Judd Trump៕

​អត្ថបទ​៖​នាង សុភា​វុ​ធ