ធាវី បាននិយាយថា ប្រធានាធិបតីកូរ៉េខាងត្បូងដែលត្រូវបានឃុំខ្លួន លោក Yoon Suk Yeol គ្មានបំណងចូលរួមក្នុងការសាកសួរនៅថ្ងៃទីពីរ ថ្ងៃព្រហស្បតិ៍នេះឡើយ ដោយបានធ្វើឱ្យរាំងស្ទះបន្ថែមទៀតក្នុងការស៊ើបអង្កេតបទព្រហ្មទណ្ឌ ជុំវិញថាតើ លោកបានប្រព្រឹត្តការបះបោរដោយបំណងដាក់ច្បាប់អាជ្ញាសឹករបស់លោក ដែរឬយ៉ាងណា។

លោក Yoon ជាប្រធានាធិបតីកូរ៉េខាងត្បូងដំបូងគេ ដែលត្រូវបានចាប់ខ្លួន ត្រូវបានគេនាំទៅកាន់មណ្ឌលឃុំឃាំងទីក្រុងសេអ៊ូលកាលពីល្ងាចថ្ងៃពុធ បន្ទាប់ពីលោកបដិសេធមិនសហការ។

អាជ្ញាធរមានពេល៤៨ម៉ោងដើម្បីសាកសួរប្រធានាធិបតីដែលត្រូវបានព្យួរពីតំណែងរូបនេះ ដែលក្រោយមកពួកគេត្រូវតែដោះលែងលោក ឬត្រូវស្វែងរកដីកាដើម្បីឃុំខ្លួនលោករហូតដល់២០ថ្ងៃ។

ការបដិសេធរបស់ លោក Yoon ក្នុងការសហការជាមួយក្រុមអ្នកស៊ើបអង្កេត កើតឡើងខណៈតុលាការធម្មនុញ្ញនឹងត្រូវបើកសវនាការជាលើកទីពីរក្នុងការជម្រះក្តីបទចោទប្រកាន់ទម្លាក់តំណែងលើលោក ដើម្បីកំណត់ថាតើត្រូវដកលោកចេញពីតំណែងជាអចិន្ត្រៃយ៍ ឬត្រូវផ្តល់អំណាចប្រធានាធិបតីដល់លោកឡើងវិញ។ ប្រទេសកូរ៉េខាងត្បូង កំពុងរកវិធីដោះស្រាយវិបត្តិនយោបាយដ៏អាក្រក់បំផុតរបស់ខ្លួន ក្នុងរយៈពេលជាច្រើនទសវត្សរ៍មកនេះ ដែលបង្កឡើងដោយការប៉ុនប៉ងរយៈពេលខ្លីរបស់លោក Yoon ក្នុងការដាក់ច្បាប់អាជ្ញាសឹក កាលពីថ្ងៃទី៣ខែធ្នូ ដែលត្រូវបានសភាបោះឆ្នោតទម្លាក់ចោល។ លោក Yoon និយាយថា លោកបានប្រគល់ខ្លួនចូលក្នុងការសាកសួរធ្វើឡើងដោយមន្ត្រីស៊ើបអង្កេតអំពើពុករលួយ ដើម្បីការពារនូវអ្វីដែលលោកហៅថាជាហានិភ័យនៃ «ការបង្ហូរឈាម» ទោះបីជាលោកនៅបន្តតវ៉ាថាវាជាការស៊ើបអង្កេតខុសច្បាប់ ហើយដីកាចាប់ខ្លួនមិនត្រឹមត្រូវតាមច្បាប់ក៏ដោយ។

មន្ត្រីមកពីការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) ដែលដឹកនាំការស៊ើបអង្កេតបទព្រហ្មទណ្ឌ បាននិយាយកាលពីថ្ងៃពុធថា រហូតមកដល់ពេលនេះ លោក Yoon នៅបដិសេធមិននិយាយជាមួយអ្នកស៊ើបអង្កេតដែលបានរៀបចំកម្រងសំណួរជាង២០០ទំព័រ ។

មន្ត្រីការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) បាននិយាយថា ការសាកសួរលើលោក Yoon នឹងបន្តនៅម៉ោង ២ រសៀល ម៉ោងក្នុងស្រុក នៅថ្ងៃព្រហស្បតិ៍ នេះ។