ប្រធានាធិបតីអ៊ុយក្រែន លោក Volodymyr Zelensky បាននិយាយកាលពីថ្ងៃពុធ (១៥ មករា) ថា ពេលនេះយោធាអ៊ុយក្រែន មានទាហានចំនួន ៨៨០.០០០នាក់ ដែលមានភារកិច្ចការពារប្រទេសទាំងមូល ប្រឆាំងនឹងកងទ័ពរុស្ស៊ីត្រឹមតែ ៦០០.០០០នាក់ ដែលប្រមូលផ្តុំនៅក្នុងតំបន់ជាក់លាក់ជាច្រើន។

ថ្លែងនៅក្នុងសន្និសីទសារព័ត៌មានរួមមួយជាមួយនាយករដ្ឋមន្ត្រីប៉ូឡូញ លោក Donald Tusk ក្នុងទីក្រុងវ៉ាសូវី លោក Zelensky បាននិយាយថា ការប្រមូលផ្តុំកងទ័ពក្នុងតំបន់ជាក់លាក់របស់រុស្ស៊ីនេះ បានបង្កើតការមានប្រៀបគិតជាតួលេខសម្រាប់អ៊ុយក្រែន។

លោកបន្តថា "កងទ័ពរុស្ស៊ី ត្រូវបានប្រមូលផ្តុំនៅក្នុងតំបន់មួយចំនួន ដូច្នេះនៅតំបន់ខ្លះពួកគេក៏មានប្រៀបផ្នែកជាបរិមាណ ប្រឆាំងនឹងយោធាទីក្រុងគីវដែរ"។

អ៊ុយក្រែន កំពុងជួបបញ្ហាកង្វះកម្លាំងទ័ព ជាពិសេសផ្នែកទ័ពថ្មើរជើង ខណៈរុស្ស៊ី បានបង្កើនការវាយលុករបស់ខ្លួននៅតំបន់ Donetsk តាំងពីរដូវក្តៅ ឆ្នាំ២០២៤ មក។ ក្រុមអ្នករិះគន់បានអំពាវនាវឱ្យមានកំណែទម្រង់ការចល័តទ័ពកាន់តែច្រើន ខណៈកងទ័ពអ៊ុយក្រែន ប្រឈមមុខនឹងបញ្ហាទាក់ទងនឹងប្រជាសាស្រ្ត និងដំណើរការប្រមូលផ្តុំមិនស្មើគ្នា៕