ក្រុមទីប្រឹក្សារបស់ប្រធានាធិបតីជាប់ឆ្នោត លោក Donald Trump ឥឡូវនេះបានទទួលស្គាល់ថា សង្រ្គាមអ៊ុយក្រែននឹងត្រូវចំណាយពេលជាច្រើនខែ ឬយូរជាងនេះដើម្បីដោះស្រាយបាន ដោយផ្ទុយពីការសន្យាគោលនយោបាយការបរទេសដ៏ធំបំផុតរបស់លោក Trump ដែលធ្លាប់អះអាងថានឹងបង្កើតកិច្ចព្រមព្រៀងសន្តិភាពរុស្ស៊ី-អ៊ុយក្រែន នៅថ្ងៃដំបូងរបស់ខ្លួននៅក្នុងសេតវិមាន។

សហការីលោក Trump ពីរនាក់ដែលពិភាក្សាពីសង្គ្រាមនៅអ៊ុយក្រែនជាមួយប្រធានាធិបតីជាប់ឆ្នោតរូបនេះ បានប្រាប់សារព័ត៌មានរ៉យទ័រថា ពួកគេកំពុងសម្លឹងមើលពេលវេលាច្រើនខែដើម្បីដោះស្រាយជម្លោះ ដោយការពារការសន្យាបញ្ចប់ជម្លោះត្រឹមមួយថ្ងៃរបស់លោក Trump និងលើកហេតុផលពីភាពជាប់គាំងមិនអាចប្រកែកបាននៃជម្លោះ និងពេលវេលាដែលត្រូវការ សម្រាប់បុគ្គលិកក្នុងរដ្ឋបាលថ្មី។

ការវាយតម្លៃទាំងនោះស្របគ្នានឹងបេសកជនរុស្ស៊ី-អ៊ុយក្រែនរបស់លោក Trump គឺលោក Keith Kellogg ដែលបាននិយាយកាលពីសប្តាហ៍មុនថា "ដំណោះស្រាយ" ចំពោះសង្រ្គាមអាចកើតមានក្នុងពេល ១០០ថ្ងៃ លើសពីពេលវេលាដើមដែលបានសន្យារបស់ប្រធានាធិបតីជាប់ឆ្នោត។

គួររម្លឹកថា នៅក្នុងយុទ្ធនាការបោះឆ្នោតថ្ងៃទី០៥ ខែវិច្ឆិកា របស់ខ្លួន លោក Trump បានប្រកាសរាប់សិបដងថា លោកនឹងធ្វើកិច្ចព្រមព្រៀងមួយរវាងអ៊ុយក្រែន និងរុស្ស៊ី នៅថ្ងៃដំបូងក្នុងតំណែងរបស់លោក ឬអាចលឿនជាងនោះទៅទៀត។ ប៉ុន្តែនៅចុងខែតុលា លោកបានផ្លាស់ប្តូរវោហាសាស្ត្ររបស់ខ្លួន ហើយចាប់ផ្តើមនិយាយថា លោកអាចដោះស្រាយសង្រ្គាមបាន "យ៉ាងឆាប់រហ័ស" ជំនួសវិញ៕