សហរដ្ឋអាមេរិកកាលពីថ្ងៃពុធ បានដាក់ទណ្ឌកម្មរាប់រយដែលកំណត់គោលដៅលើប្រទេស រុស្ស៊ី ដោយស្វែងរកការបង្កើនសម្ពាធលើទីក្រុងមូស្គូ នៅប៉ុន្មានថ្ងៃចុងក្រោយរបស់រដ្ឋបាលលោក ចូ បៃដិន និងការពារទណ្ឌកម្មមួយចំនួនដែលបានដាក់ពីមុនមកនោះ។

ក្រសួងការបរទេសនិងក្រសួងរតនាគាររបស់សហរដ្ឋអាមេរិក បានដាក់ទណ្ឌកម្មលើគោលដៅជាង ២៥០ រួមទាំងមានមូលដ្ឋាន នៅក្នុងប្រទេសចិន ដោយផ្តោតលើការគេចវេសពីទណ្ឌកម្មរបស់រុស្ស៊ី និងមូលដ្ឋានឧស្សាហកម្មយោធារបស់ប្រទេសនេះ។

ជាផ្នែកមួយនៃចំណាត់ការនេះ ក្រសួងរតនាគារ បានដាក់ការទប់ស្កាត់ថ្មីលើអង្គភាពជិត ១០០ ដែលស្ថិតនៅក្រោមការដាក់ទណ្ឌកម្មរួចហើយ ដែលអាចធ្វើឲ្យមានភាពស្មុកស្មាញដល់កិច្ចខិតខំប្រឹងប្រែងនាពេលអនាគត ដើម្បីដកចេញវិធានការទាំងនេះ។

ស្ថានទូតរុស្ស៊ីប្រចាំនៅទីក្រុងវ៉ាស៊ីនតោន មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

នៅក្នុងសេចក្តីថ្លែងការណ៍មួយ ក្រសួងរតនាគារ បានលើកឡើងថា ទីក្រុងវ៉ាស៊ីនតោន កំពុងដាក់ទណ្ឌកម្មថ្មីលើអង្គភាពសំខាន់ៗរបស់រុស្ស៊ី ជិត ១០០អង្គភាព រួមទាំងធនាគារ និងក្រុមហ៊ុនរុស្ស៊ី ដែលកំពុងប្រតិបត្តិការក្នុងវិស័យថាមពលរបស់រុស្ស៊ី ដែលត្រូវបានដាក់ទណ្ឌកម្មពីមុនដោយសហរដ្ឋអាមេរិក។ ក្រសួងនេះ បានបញ្ជាក់ថា ការសម្រេចនេះ បង្កើនហានិភ័យនៃទណ្ឌកម្មជាបន្តបន្ទាប់សម្រាប់ពួកគេ។