នៅពេលដែលក្រុមសកម្មប្រយុទ្ធហាម៉ាស បានធ្វើការវាយប្រហារដ៏អាក្រក់បំផុតមិនធ្លាប់មានលើអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ពួកគេបានចាប់ចំណាប់ថ្នូរ ២៥១នាក់ចូលទៅក្នុងតំបន់ហ្កាហ្សាស្ទ្រីប ដោយអ្នកខ្លះបានបាត់បង់ជីវិតហើយ។

កាលថ្ងៃពុធ (ទី១៥ ខែមករា) អ្នកសម្រុះសម្រួលបានប្រកាសថា អ៊ីស្រាអែល និងក្រុមហាម៉ាស បានឈានដល់កិច្ចព្រមព្រៀង ដើម្បីឲ្យមានបទឈប់បាញ់ និងការដោះដូរចំណាប់ថ្នូរ និងអ្នកទោស។

សម្រាប់ក្រុមហាម៉ាសដែលគ្រប់គ្រងតំបន់ហ្កាហ្សា ចំណាប់ថ្នូរ គឺជាការមានប្រៀបដ៏ធំ សម្រាប់ការចរចាជាមួយអ៊ីស្រាអែល ដើម្បីទទួលបានបទឈប់បាញ់ និងការដោះលែងអ្នកទោសប៉ាឡេស្ទីន។

ក្នុងចំណោមចំណាប់ថ្នូរ ២៥១នាក់ដែលត្រូវបានចាប់ខ្លួនដោយពួកសកម្មប្រយុទ្ធ កាលពីថ្ងៃទី៧ ខែតុលា ឆ្នាំ២០២៣ មាន ១១៧នាក់ ត្រូវបានដោះលែងដែលភាគច្រើនជាស្ត្រី កុមារ និងកម្មករបរទេស។ ភាគច្រើនត្រូវបានដោះលែង ក្នុងអំឡុងពេលមានបទឈប់បាញ់រយៈពេល ១សប្តាហ៍ ក្នុងខែវិច្ឆិកា ឆ្នាំ២០២៣ ជាថ្នូរនឹងអ្នកទោសប៉ាឡេស្ទីន ២៤០នាក់ដែលត្រូវបានឃុំខ្លួននៅក្នុងពន្ធនាគាររបស់អ៊ីស្រាអែល។

អ៊ីស្រាអែលជឿថា ចំណាប់ថ្នូរ ៦០នាក់ដែលនៅតែត្រូវបានឃុំខ្លួន ក្នុងតំបន់ហ្កាហ្សា មិនទាន់បាត់បង់ជីវិតទេ ខណៈ ៣៤នាក់ ត្រូវបានកងទ័ពប្រកាសថា ស្លាប់។ យោធាបាននាំយកមកកាន់ប្រទេសវិញនូវសពចំណាប់ថ្នូរ ៤០នាក់ដែលបានស្លាប់ នៅក្នុងតំបន់ហ្កាហ្សា ឬត្រូវបានសម្លាប់ កាលពីថ្ងៃទី៧ ខែតុលាឆ្នាំ២០២៣ និងដែលត្រូវបាននាំយកទៅកាន់ដែនដីនេះ៕