ប្រភពព័ត៌មានជាច្រើនរបស់រុស្ស៊ី និយាយថា កូរ៉េខាងជើង នឹងចូលរួមក្នុងក្បួនព្យុហយាត្រាទិវាជ័យជម្នះក្នុងទីក្រុងមូស្គូ ក្នុងខែឧសភា ខាងមុខ។ ព្រឹត្តិការណ៍នេះ គឺជាការប្រារព្ធទិវាជ័យជម្នះរបស់អតីតសហភាពសូវៀត លើពួកណាស៊ីអាល្លឺម៉ង់។ ប្រភពព័ត៌មានបានប្រាប់ ប្រព័ន្ធផ្សព្វផ្សាយ NHK ថា ការចូលរួមរបស់យោធាប្រទេសកូរ៉េខាងជើងក្នុងទិវាជ័យជម្នះសង្គ្រាមលោកលើកទី២ នៅថ្ងៃទី៩ ខែឧសភា ត្រូវបានសម្រេចរួចហើយ។

ប្រភពនិយាយថា បុគ្គលិកកូរ៉េខាងជើងរាប់សិបនាក់ត្រូវបានគេរំពឹងថានឹងទៅចូលរួម។ ប្រភពផ្នែកការទូតផ្សេងទៀត បាននិយាយថា ក្រុមតន្រ្តីយោធាកូរ៉េខាងជើងនឹងទៅចូលរួមក្នុងព្រឹត្តិការណ៍តន្ត្រីមួយនៅក្នុងរដ្ឋធានីប្រទេសរុស្ស៊ី នៅចុងខែសីហា ឆ្នាំនេះ។ ប្រភពបាននិយាយថា យោធាកូរ៉េខាងជើងនឹងទៅចូលរួមក្នុងព្រឹត្តិការណ៍ទាំងនេះ ជាលើកដំបូង។

កាលពីថ្ងៃពុធ រដ្ឋមន្ត្រីការពារជាតិរុស្ស៊ី លោក Andrei Belousov បាននិយាយថា អង្គភាពយោធា មកពីប្រទេសជាមិត្តចំនួន១៩ប្រទេស ត្រូវបានអញ្ជើញឱ្យចូលរួមក្នុងព្យុហយាត្រាទិវាជ័យជំនះនេះ។ លោក និយាយថាប្រទេសចំនួន១០ បានបញ្ជាក់ពីការចូលរួមរបស់ពួកគេរួចហើយ ប៉ុន្តែលោកពុំបាននិយាយអំពីឈ្មោះប្រទេសទាំងនោះទេ។

រុស្ស៊ី និងកូរ៉េខាងជើង បានចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយ។ កតិកាសញ្ញានេះ អំពាវនាវឱ្យមានជំនួយយោធាទៅវិញទៅមក ប្រសិនបើប្រទេសណាមួយត្រូវបានគេវាយប្រហារ ខណៈប្រទេសទាំងពីរ បាននិងកំពុងពង្រឹងកិច្ចសហប្រតិបត្តិការយោធា។ 

ទីក្រុងព្យុងយ៉ាង បានបញ្ជូនទាហានទៅកាន់ប្រទេសរុស្ស៊ី ខណៈទីក្រុងក្រុងមូស្គូ បន្តការវាយលុករបស់ខ្លួននៅអ៊ុយក្រែន។