ទូរទស្សន៍ Al Jazeera បានរាយការណ៍ ដោយដកស្រង់សម្តីក្រសួងសុខាភិបាលហ្កាហ្សាដែលបានបញ្ជាក់ថា ចំនួនអ្នកស្លាប់ដោយសារការវាយប្រហាររបស់អ៊ីស្រាអែល លើតំបន់ហ្កាហ្សាស្ទ្រីប ចាប់តាំងពីការចាប់ផ្តើមនៃការកើនឡើងភាពតានតឹងនាពេលបច្ចុប្បន្ននៃជម្លោះប៉ាឡេស្ទីន និងអ៊ីស្រាអែល នៅដើមខែតុលា ឆ្នាំ ២០២៣ បានកើនឡើងលើស ៤៦.៧00 នាក់ ជាមួយនឹងមនុស្សជាង ១១០.២០០ នាក់បាន រង     របួស។ 

យោងតាមក្រសួងបានឲ្យដឹងថា មនុស្ស ៤៦.៧០៧នាក់ ត្រូវបានសម្លាប់ ក្នុងនោះ ៨២ នាក់ ក្នុងរយៈពេល ២៤ម៉ោងប៉ុណ្ណោះ។ ជនស៊ីវិល ២៥៣នាក់ បានទទួលរបួស ក្នុងអំឡុងពេលវាយប្រហារកាលពីថ្ងៃពុធ ដែលនាំឲ្យចំនួនសរុបនៃអ្នករងរបួសកើនឡើងដល់ ១១០.២៦៥នាក់។

ក្រសួងក៏បាននិយាយដែរថា អ្នកស្លាប់ និងរបួសជាច្រើននាក់ នៅតែស្ថិតនៅក្រោមគំនរបាក់បែក ខណៈក្រុមគ្រូពេទ្យ មិនអាចទៅដល់ពួកគេបានទេ ដោយសារតែមានអរិភាពបន្ត។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ានៅថ្ងៃទី ០៧ ខែតុលា ឆ្នាំ ២០២៣ ក្រោយពីក្រុមយុទ្ធជនមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សាស្ទ្រីប បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែល ដោយបានសម្លាប់អ្នកស្រុករស់នៅតាមព្រំដែនអ៊ីស្រាអែល និងចាប់ពង្រត់ជនជាតិអ៊ីស្រាអែលជាង ២៤០នាក់ ក្នុងនោះមានស្ត្រី កុមារ និងមនុស្សចាស់។