នាយករដ្ឋមន្ត្រីប្រទេសដាណឺម៉ាក លោកស្រី Mette Frederiksen បានអញ្ជើញបណ្ដាមេដឹកនាំធុរកិច្ចរបស់ប្រទេសឲ្យចូលរួមកិច្ចប្រជុំមួយ នៅថ្ងៃព្រហស្បតិ៍ (ទី១៦ ខែមករា) នេះ បន្ទាប់ពីប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump កាលពីសប្តាហ៍មុន បានគំរាមកំហែងចាត់វិធានការផ្នែកយោធា ឬសេដ្ឋកិច្ច ដូចជាការដំឡើងពន្ធជាដើម ដើម្បីគ្រប់គ្រងដែនដី Greenland។

លោក Trump បាននិយាយថា វាគឺជា «រឿងចាំបាច់យ៉ាងពិតប្រាកដ» សម្រាប់សហរដ្ឋអាមេរិក ក្នុងការបានគ្រប់គ្រងលើកោះអាកទិកដ៏ធំមួយនេះ ដែលជាដែនដីពាក់កណ្តាលស្វយ័តរបស់ប្រទេសដាណឺម៉ាក។

អំឡុងពេលសន្ទនាតាមទូរសព្ទរយៈពេល ៤៥នាទី កាលពីថ្ងៃពុធ (ទី១៥ ខែមករា) លោកស្រី Frederiksen បានប្រាប់លោក Trump ថា វាអាស្រ័យលើដែនដី Greenland សម្រេចពីអនាគតរបស់ខ្លួន ហើយថា ប្រទេសដាណឺម៉ាកមានឆន្ទៈ ក្នុងការធ្វើការបន្ថែមទៀត ដើម្បីពង្រឹងសន្តិសុខ នៅតំបន់អាក់ទិក។

ជាមួយគ្នានេះ លោកស្រីក៏បានសង្កត់ធ្ងន់ផងដែរថា ក្រុមហ៊ុនដាណឺម៉ាក បានរួមចំណែកដល់កំណើនសេដ្ឋកិច្ច និងការងារ នៅសហរដ្ឋអាមេរិក ហើយថា សហភាពអឺរ៉ុប និងសហរដ្ឋអាមេរិក មានផលប្រយោជន៍រួម ក្នុងការបង្កើនពាណិជ្ជកម្ម។

គួរបញ្ជាក់ថា ដាណឺម៉ាក គឺជាមូលដ្ឋានរបស់ក្រុមហ៊ុនជាច្រើន ដូចជាក្រុមហ៊ុនផលិតឱសថ Novo Nordisk ក្រុមដឹកជញ្ជូន Maersk ក្រុមហ៊ុនផលិតស្រាបៀរ Carlsberg ក្រុមហ៊ុនផលិតប្រដាប់ប្រដាក្មេងលេង Lego ក្រុមហ៊ុនផលិតគ្រឿងអលង្ការ Pandora និងក្រុមហ៊ុនផលិតទួរប៊ីនខ្យល់ Vestas៕