បើតាមក្រសួងការបរទេសនៃប្រទេសទាំង២ នាថ្ងៃព្រហស្បតិ៍ (ទី១៦ ខែមករា) នេះ បានប្រាប់ឲ្យដឹងថា ហ្វីលីពីន និងចិន បានព្រមព្រៀងគ្នាស្វែងរកមូលដ្ឋានរួម និងរាវរកវិធីសាស្ត្រនានា ដើម្បីធ្វើកិច្ចសហប្រតិបត្តិការ បើទោះបីជាមានការខ្វែងគំនិតគ្នា នៅក្នុងសមុទ្រចិនខាងត្បូងក៏ដោយ ខណៈដែលជម្លោះដ៏ក្តៅគគុក នៅតែបន្តកើតមាន ពាក់ព័ន្ធទៅនឹងនាវាដែលត្រូវបានដាក់ពង្រាយ នៅជុំវិញតំបន់មានជម្លោះនានា។

នៅថ្ងៃព្រហស្បតិ៍នេះ ប្រទេសទាំង២ បានបើកកិច្ចពិភាក្សាជុំទី១០ ក្រោមយន្តការពិគ្រោះទ្វេភាគី ដែលបង្កើតឡើង ដើម្បីដោះស្រាយបញ្ហានានា នៅសមុទ្រចិនខាងត្បូង ជាកន្លែងដែលជម្លោះតែងតែកើតមានជាញឹកញាប់ និងតានតឹង ដោយធ្វើឲ្យទំនាក់ទំនងធ្លាក់ដល់ចំណុចទាបបំផុត ក្នុងរយៈពេលជាច្រើនឆ្នាំមកនេះ។

ជាមួយគ្នានេះ ប្រទេសទាំង២ ក៏បានប្រាប់ផងដែរថា ពួកគេបានយល់ព្រមលើកកម្ពស់កិច្ចសហប្រតិបត្តិការឆ្មាំល្បាតឆ្នេរ និងវិទ្យាសាស្ត្រដែនសមុទ្រ ហើយបានប្ដេជ្ញាថា នឹងដោះស្រាយបញ្ហានានា ដោយសន្តិវិធី។

អនុរដ្ឋមន្ត្រីក្រសួងការបរទេសហ្វីលីពីន លោកស្រី Theresa Lazaro បាននិយាយនៅក្នុងសុន្ទរកថាបើករបស់លោកស្រីថា៖ «យើងជឿជាក់យ៉ាងមុតមាំថា ទោះបីជាមានបញ្ហាប្រឈម និងការខ្វែងគំនិតគ្នាដែលមិនទាន់ត្រូវបានដោះស្រាយក៏ដោយ ក៏មានឱកាសយ៉ាងពិតប្រាកដ ក្នុងការបង្កើតកិច្ចសហប្រតិបត្តិការការទូត និងជាក់ស្តែង ដើម្បីដោះស្រាយបញ្ហារបស់យើង នៅសមុទ្រចិនខាងត្បូង»។

ចំណែកប្រទេសចិនបានលើកឡើងថា ខ្លួនបានអំពាវនាវឲ្យហ្វីលីពីនបន្តរក្សាការប្តេជ្ញាចិត្ត ក្នុងការដោះស្រាយការខ្វែងគំនិតគ្នា តាមរយៈការសន្ទនា និងការពិគ្រោះយោបល់៕