ចក្រភពអង់គ្លេសបានផ្តល់ការអនុញ្ញាតដល់រោងចក្ររ៉ូកែត Augsburg ដើម្បីបាញ់បង្ហោះផ្កាយរណបពីទីតាំង នៅភាគខាងជើងប្រទេសស្កុតឡែន នៅថ្ងៃព្រហស្បតិ៍ (ទី១៦ ខែមករា) នេះ ដែលអាចបើកផ្លូវឲ្យមានបេសកកម្មអវកាសពាណិជ្ជកម្មជាទៀងទាត់ពីដែនដីអឺរ៉ុប។

បន្ទាប់ពីទទួលបានអាជ្ញាប័ណ្ណ រ៉ូកែត ឬយានចម្លងកម្ពស់ ៣០ម៉ែត្ររបស់ក្រុមហ៊ុនអាល្លឺម៉ង់ RFA ទទួលបានការអនុញ្ញាតឲ្យបាញ់បង្ហោះ ដើម្បីនាំយកផ្កាយរណបទៅដាក់ក្នុងគន្លងតារាវិថី។ បុគ្គលដែលដឹងពីពេលវេលានៃការបាញ់បង្ហោះ បាននិយាយថា ការហោះឡើងត្រូវបានគេរំពឹងថា នឹងកើតមាននៅក្នុងត្រីមាសទី៣ នៃឆ្នាំនេះ។

អស់រយៈពេលជាច្រើនឆ្នាំមកហើយ ចក្រភពអង់គ្លេសបាន និងកំពុងប្រឹងប្រែងបន្ថែមសមត្ថភាពបាញ់បង្ហោះ ចំពោះឧស្សាហកម្មអវកាសដ៏រីកចម្រើនរបស់ខ្លួន ដែលមានបុគ្គលិកជាង ៤៥.០០០នាក់ និងដែលបង្កើតបានផ្កាយរណបច្រើនជាងប្រទេសណាទាំងអស់ នៅក្រៅសហរដ្ឋអាមេរិក។

ប៉ុន្តែកិច្ចខិតខំប្រឹងប្រែងរបស់ប្រទេសនេះ ដើម្បីទទួលបានទីតាំងឈរជើង នៅលំហអាកាស ត្រូវបានជួបនឹងបញ្ហាដ៏ធំមួយ កាលពី ២ឆ្នាំមុន នៅពេលដែលការបាញ់បង្ហោះរ៉ូកែតផ្តេកពីទីក្រុង Newquay ភាគនិរតីនៃប្រទេសអង់គ្លេស មិនទទួលបានជោគជ័យ។ ដូច្នេះ ការបាញ់បង្ហោះរ៉ូកែតបញ្ឈរ ដោយជោគជ័យ នៅចុងឆ្នាំ២០២៥ នឹងជួយជំរុញដល់ឧស្សាហកម្មនេះឲ្យមានភាពល្អប្រសើរឡើងវិញ៕