ដោយដកស្រង់សម្ដីរបស់បេសកជនអ៊ីរ៉ង់ ទីភ្នាក់ងារព័ត៌មានរដ្ឋ TASS នៅថ្ងៃព្រហស្បតិ៍ (ទី១៦ ខែមករា) នេះ បានរាយការណ៍ថា កិច្ចព្រមព្រៀងសហប្រតិបត្តិការជាយុទ្ធសាស្ត្រដែលប្រទេសរុស្ស៊ី និងអ៊ីរ៉ង់ ត្រៀមចុះហត្ថលេខា នឹងមិនមានរួមបញ្ចូលលក្ខន្តិកការពារគ្នាទៅវិញទៅមក ដូចកតិកាសញ្ញាដែលទីក្រុងមូស្គូ បានចុះហត្ថលេខាជាមួយទីក្រុងព្យុងយ៉ាង និងទីក្រុងមីនស្ក៍នោះឡើយ។

ឯកអគ្គរដ្ឋទូតអ៊ីរ៉ង់ ប្រចាំនៅទីក្រុងមូស្គូ លោក Kazem Jalali ដែលត្រូវបានដកស្រង់សម្តីដោយសារព័ត៌មាន TASS បាននិយាយថា៖ «ប្រភេទនៃកិច្ចព្រមព្រៀង គឺមិនដូចគ្នានោះទេ។ ពួកគេ (បេឡារុស និងកូរ៉េខាងជើង) បានបង្កើតទំនាក់ទំនងភាពជាដៃគូ (ជាមួយទីក្រុងមូស្គូ) នៅក្នុងវិស័យមួយចំនួន ដែលយើងមិនបាននិយាយដល់ជាពិសេស។ ឯករាជ្យភាព និងសន្តិសុខរបស់ប្រទេសយើង ព្រមទាំងការពឹងផ្អែកលើខ្លួនឯង គឺមានសារៈសំខាន់ខ្លាំងបំផុត។ យើងមិនចាប់អារម្មណ៍ចូលរួមជាមួយប្លុកណាឡើយ»។

រុស្ស៊ីមានភាពជាដៃគូជាមួយកូរ៉េខាងជើង និងបេឡារុស ដែលរួមមានទាំងលក្ខន្តិកការការពារគ្នាទៅវិញទៅមក។ លោក Jalali ត្រូវបានដកស្រង់សម្តីដែលបាននិយាយថា អ៊ីរ៉ង់នឹងធានាសន្តិសុខរបស់ខ្លួនដោយខ្លួនឯងផ្ទាល់។

គួរបញ្ជាក់ថា វិមានក្រឹមឡាំង បានឲ្យដឹងកាលពីថ្ងៃចន្ទដើមសប្ដាហ៍នេះថា ប្រធានាធិបតីរុស្ស៊ី លោក Vladimir Putin និងប្រធានាធិបតីអ៊ីរ៉ង់ លោក Masoud Pezeshkian គ្រោងនឹងជួបពិភាក្សាគ្នា នៅប្រទេសរុស្ស៊ី នាថ្ងៃទី១២ ខែមករា បន្ទាប់មកមេដឹកនាំទាំង២ នឹងចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយដែលទន្ទឹងរង់ចាំជាយូរមកហើយ៕