នៅព្រឹកថ្ងៃទី១៧ ខែមករា ឆ្នាំ២០២៥នេះ តាងនាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាជ្ញាធរមីន និងលោកជំទាវបណ្ឌិត ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន អញ្ជើញចូលរួម​ក្នុង​ពិធី​បុណ្យ​ស​​ពរបស់ លោក ពៅ នេពីន ស្ថិតក្នុងស្រុកស្វាយចេក ខេត្តបន្ទាយមានជ័យ ដែល​ជា​បុគ្គលិក​បោស​សម្អាត​មីន​​របស់​មជ្ឈ​មណ្ឌល​សកម្ម​ភាព​កំចាត់​មីន​កម្ពុជា គ្រោះថ្នាក់បាត់បង់​ជីវិត​ក្នុង​ឧបទ្ទវ​ហេតុ​ផ្ទុះមីន។

ក្នុងឱកាសសម្តែងនូវសមានទុក្ខនោះ ឯកឧត្តមទេសរដ្ឋមន្រ្តី លី ធុជ បានពាំនាំ​នូវ​សារ​រំលែក​មរណ​ទុក្ខដ៏​ក្រៀមក្រំ និងការសោកស្តាយជាទីបំផុតពីសម្តេចធិបតី និងលោកជំទាវបណ្ឌិត ជូន​ចំពោះ​ក្រុម​គ្រួសារនៃសព លោក ពៅ នេពីន ដែលបានពលីកម្ម​ក្នុង​ការ​ចូល​រួម​ចំណែក​យ៉ាង​សកម្ម​ក្នុង​ការងារ​បោសសម្អាតមីន ដើម្បីធានាបានឱ្យ​ប្រជាពលរដ្ឋ​រស់​នៅ​ទទួល​សុខ​សុវត្ថិភា​ព​ពី​គ្រាប់​មីន និងមានជីវភាពរស់នៅល្អប្រសើរជាងមុន តាមរយៈការរួមចំណែកក្នុងការប្រែក្លាយដីមីន ទៅ​ជា​ដីមាស។