កោះតៃវ៉ាន់ បានអនុវត្តការប្រហារជីវិតជាលើកដំបូងរបស់ខ្លួនក្នុងរយៈពេលប្រាំឆ្នាំចុងក្រោយនេះកាលពីថ្ងៃព្រហស្បតិ៍ (១៦ មករា) ដោយបង្កឱ្យមានការខឹងសម្បារពីក្រុមសិទ្ធិមនុស្ស និងសហភាពអឺរ៉ុប ដែលបានអំពាវនាវោវឱ្យរដ្ឋាភិបាលកោះតៃវ៉ាន់ រក្សាការផ្អាកតាមជាក់ស្ដែងលើការកាត់ទោសប្រហារជីវិត។

ទោះបីកោះតៃវ៉ាន់ ជាតំបន់ប្រជាធិបតេយ្យសេរីបំផុតរបស់អាស៊ីក៏ដោយ ក៏ទោសប្រហារជីវិតបែបនេះនៅតែមិនទទួលបានការគាំទ្រឡើយយោងតាមការស្ទង់មតិ។

កាលពីខែកញ្ញា តុលាការកោះតៃវ៉ាន់បានសម្រេចថា ទោសប្រហារជីវិតមានលក្ខណៈស្របតាមធម្មនុញ្ញ ប៉ុន្តែគឺសម្រាប់តែឧក្រិដ្ឋកម្មធ្ងន់ធ្ងរបំផុតប៉ុណ្ណោះ ជាមួយនឹងការត្រួតពិនិត្យផ្លូវច្បាប់យ៉ាងហ្មត់ចត់។

អាជ្ញាធរតៃវ៉ាន់ និយាយថា អ្នកទោសឈ្មោះ Huang Lin-kai ត្រូវបានប្រហារជីវិតនៅមជ្ឈមណ្ឌលឃុំឃាំងក្រុងតៃប៉ិ បន្ទាប់ពីត្រូវកាត់ទោសកាលពីឆ្នាំ២០១៧ ពីបទឃាតកម្មក្នុងឆ្នាំ២០១៣ លើអតីតមិត្តស្រី និងម្តាយរបស់នារីរងគ្រោះរូបនោះ ហើយជនល្មើសនេះក៏បានចាប់រំលោភអតីតសង្សាររបស់ខ្លួនដែរ។

សេវាការទូតរបស់សហភាពអឺរ៉ុប បានប្រតិកម្មយ៉ាងខឹងសម្បារចំពោះការប្រហារជីវិតនោះ ដោយបញ្ជាក់ពីការប្រឆាំងដាច់ខាតរបស់ខ្លួនចំពោះទោសប្រហារជីវិត។ ក្រុមសិទ្ធិមនុស្សក៏បានសម្តែងការខកចិត្ត ដោយលើកឡើង ការប្រហារជីវិតនឹង "ធ្វើឱ្យសង្គមកាន់តែស្រេកឃ្លានឈាមប៉ុណ្ណោះ"៕