ជោគវាសនារបស់ TikTok បានប្រែជាល្អកាលពីថ្ងៃព្រហស្បតិ៍ (១៦ មករា) ខណៈមន្ត្រីអាមេរិកកាន់តែច្រើនឡើងបាននិយាយថា ក្រុមហ៊ុនមេចិន គួរតែមានពេលវេលាបន្ថែមទៀតដើម្បីលក់កម្មវិធីនោះ ហើយបញ្ឈប់អេបវីដេអូខ្លីនេះពីការហាមឃាត់ មុនពេលប្រធានាធិបតីជាប់ឆ្នោត លោក Donald Trump ត្រលប់ទៅសេតវិមានវិញ។

ទីប្រឹក្សាសន្តិសុខជាតិថ្មីរបស់លោក Trump និយាយថា រដ្ឋបាលបក្សសាធារណៈរដ្ឋថ្មីនឹងរក្សាទុកកម្មវិធីប្រព័ន្ធផ្សព្វផ្សាយសង្គម ដែលប្រើប្រាស់ដោយជនជាតិអាមេរិកចំនួន ១៧០លាននាក់មួយនេះឱ្យនៅរស់រានក្នុងសហរដ្ឋអាមេរិក ប្រសិនបើមានកិច្ចព្រមព្រៀងអាចសម្រេចបាន ហើយព្រឹទ្ធសមាជិកជាន់ខ្ពស់បក្សប្រជាធិបតេយ្យ លោក Chuck Schumer ក៏បានជំរុញឱ្យលោកប្រធានាធិបតី Joe Biden បន្តរយៈពេល ៩០ថ្ងៃទៀត បន្ថែមពីលើថ្ងៃផុតកំណត់ជិតមកដល់ដើម្បីបិទអេប នៅថ្ងៃអាទិត្យ ១៩ មករា នេះ។

ច្បាប់ដែលបានអនុម័តកាលពីខែមេសា ផ្តល់សិទ្ធិឱ្យម្ចាស់ TikTok គឺក្រុមហ៊ុនមេ ByteDance លក់ទ្រព្យសម្បត្តិរបស់ TikTok នៅអាមេរិក ត្រឹមថ្ងៃអាទិត្យ ១៩ មករា ទៅឱ្យអ្នកទិញដែលមិនមែនជាជនជាតិចិន បើមិនដូច្នេះទេនឹងត្រូវហាមឃាត់ ដោយសារក្ដីបារម្ភអំពីសន្តិសុខជាតិ។

បច្ចុប្បន្ន តុលាការកំពូលអាមេរិក កំពុងសម្រេចថា តើត្រូវរក្សាច្បាប់នេះ និងអនុញ្ញាតឱ្យ TikTok ត្រូវបានហាមឃាត់នៅថ្ងៃអាទិត្យ ឬលុបចោលបម្រាម ឬមួយក៏ផ្អាកសិន ដើម្បីផ្តល់ពេលវេលាបន្ថែមដល់ចៅក្រមក្នុងការសម្រេចចិត្ត។ តុលាការនិយាយថាខ្លួនអាចនឹងចេញសេចក្តីសម្រេចនៅថ្ងៃសុក្រ ១៧ មករា នេះ ប៉ុន្តែតាមទម្លាប់ មិនបានចែងថារឿងក្តី ឬករណីណាមួយនឹងត្រូវសម្រេចនោះទេ៕