អង្គភាពសេវាសង្គ្រោះបន្ទាន់ និងនគរបាលបាននិយាយកាលពីថ្ងៃព្រហស្បតិ៍ថា មនុស្សយ៉ាងហោចណាស់ពីរនាក់ បានស្លាប់នៅសាលារៀនមួយកន្លែងនៅភាគខាងជើងប្រទេសស្លូវ៉ាគី បន្ទាប់ពីសិស្សម្នាក់ បានវាយប្រហារគ្រូបង្រៀនម្នាក់ និងមិត្តរួមថ្នាក់ពីរនាក់ដោយកាំបិត។

អ្នកនាំពាក្យអង្គភាពសេវាសង្គ្រោះបន្ទាន់ប្រទេសស្លូវ៉ាគី លោក Danka Capakova បានប្រាប់សារព័ត៌មានរ៉យទ័រថា បុគ្គលិកជាច្រើននាក់ត្រូវបានបញ្ជូនទៅកាន់សាលារៀនវិទ្យាល័យមួយកន្លែង នៅ ទីក្រុងSpisska Stara Ves ។

នគរបាលនិយាយថា សិស្សម្នាក់ បានវាយប្រហារលើគ្រូបង្រៀនម្នាក់ និងមិត្តរួមថ្នាក់ពីរនាក់ ហើយយ៉ាងហោចណាស់មនុស្សពីរនាក់បានស្លាប់ និងម្នាក់ទៀតបានរងរបួស។

នគរបាលនិយាយថា សិស្សអាយុ១៨ឆ្នាំម្នាក់ ត្រូវបានសង្ស័យថាបានប្រព្រឹត្តសកម្មភាពវាយប្រហារនេះ ត្រូវបានឃុំខ្លួនភ្លាមៗបន្ទាប់ពីការវាយប្រហារ។

ក្រសួងមហាផ្ទៃបាននិយាយនៅក្នុងសេចក្តីថ្លែងការណ៍ថា «អរគុណចំពោះការឃាត់ខ្លួនបានជនសង្ស័យភ្លាមៗ ហើយនគរបាលកំពុងចាត់វិធានការចាំបាច់បន្ថែមទៀតដើម្បីធានាបានសុវត្ថិភាព»។

ក្រសួងនិយាយថា រដ្ឋមន្ត្រីក្រសួងមហាផ្ទៃ ក្រសួងអប់រំ និងស្នងការនគរបាល បានធ្វើដំណើរទៅកាន់ទីក្រុង Spisska Stara Ves ជាទីក្រុងដែលមានប្រជាជនជាង២.០០០នាក់នៅតាមព្រំដែនប្រទេសប៉ូឡូញ។

អំពើហិង្សាធ្ងន់ធ្ងរ គឺកម្រកើតមានណាស់នៅក្នុងប្រទេសស្លូវ៉ាគី ជាប្រទេសអឺរ៉ុបកណ្តាល មានប្រជាជន៥,៤លាននាក់។ ប្រទេសនេះ មានការភ្ញាក់ផ្អើលកាលពីខែឧសភា ឆ្នាំមុន នៅពេលដែលនាយករដ្ឋមន្ត្រី លោក Robert Fico ត្រូវបានគេបាញ់ ក្នុងការប៉ុនប៉ងធ្វើឃាតលោក។