អ្នកនាំពាក្យការិយាល័យកិច្ចការកោះតៃវ៉ាន់ របស់ប្រទេសចិន បាននិយាយកាលពីថ្ងៃពុធ (១៥ មករា) សប្ដាហ៍នេះថា កិច្ចខិតខំប្រឹងប្រែងនឹងនៅតែបន្តក្នុងការបង្ក្រាបកងកម្លាំងផ្ដាច់ខ្លួនរបស់តំបន់តៃវ៉ាន់ និងជំរុញដំណើរការបង្រួបបង្រួមជាតិនៅឆ្នាំ២០២៥ នេះ។

ថ្លែងនៅក្នុងសន្និសីទសារព័ត៌មាននៅទីក្រុងប៉េកាំង អ្នកនាំពាក្យ លោក Chen Binhua បានបដិសេធនូវការប្រឌិតរឿងមិនពិតដែលគាំទ្រដោយលោក Lai Ching-te មេដឹកនាំតំបន់តៃវ៉ាន់ របស់ប្រទេសចិន ដែលបានលាតត្រដាងពីចេតនាផ្តាច់ខ្លួនរបស់លោក។

លោក Chen បានលើកឡើងថា "អ្វីដែលហៅថា 'លទ្ធិប្រជាធិបតេយ្យ' របស់អាជ្ញាធរតំបន់តៃវ៉ាន់ គឺជារឿងក្លែងក្លាយ ហើយបម្រើដល់ចេតនាផ្តាច់ខ្លួនរបស់ពួកគេ។ ការផ្តាច់ខ្លួនរបស់តៃវ៉ាន់ គឺជាផ្លូវទាល់ ហើយមានតែការបង្រួបបង្រួមទេគឺជាផ្លូវចេញដ៏ល្អ"។

ប្រទេសចិន ក្នុងប៉ុន្មានឆ្នាំថ្មីៗនេះ បានបង្កើនសម្ពាធផ្នែកយោធា រួមទាំងការប្រមូលផ្តុំកងកម្លាំងទ័ពជើងទឹកដ៏ច្រើន និងសកម្មភាពយោធាប្រចាំថ្ងៃនៅជិតកោះស្វ័យគ្រប់គ្រងតៃវ៉ាន់ ដែលទីក្រុងប៉េកាំង អះអាងសិទ្ធិថាជាតំបន់របស់ខ្លួន៕