យោធាអ៊ីស្រាអែលបាននិយាយថា ខ្លួនបានវាយប្រហារទីតាំងប្រហែល ៥០កន្លែង នៅទូទាំងតំបន់ហ្កា ហ្សាស្ទ្រីប កាលពីថ្ងៃព្រហស្បតិ៍ មួយថ្ងៃបន្ទាប់ពីខ្លួនបានយល់ព្រមលើកិច្ចព្រមព្រៀងឈប់បាញ់ ជាមួយក្រុមហាម៉ាស។

នៅក្នុងសេចក្តីថ្លែងការណ៍មួយ យោធាបាននិយាយថា ការវាយប្រហារ បានកំណត់គោលដៅទៅលើក្រុម សកម្មប្រយុទ្ធ ដែលបានចូលរួមក្នុងការវាយលុកដឹកនាំដោយក្រុមហាម៉ាស លើសហគមន៍អ៊ីស្រាអែល ក្នុងខែតុលា ឆ្នាំ ២០២៣។ យោធាបានបន្ថែមថា ក្រុមសកម្មប្រយុទ្ធ «បានចូលរួមក្នុងការសម្លាប់រង្គាល នៅឯពិធីបុណ្យប្រគុំតន្ត្រី Nova» ។

កងទ័ពអ៊ីស្រាអែល ក៏បានវាយប្រហារទៅលើមូលដ្ឋានយោធារបស់ក្រុមហាម៉ាស និងក្រុមជីហាដឥស្លាមផ្សេងទៀត កន្លែងផ្ទុកនិងផលិតអាវុធ ទីតាំងបាញ់រ៉ូកែត និងប៉ុស្តិ៍សង្កេតការណ៍។ នេះបើយោងតាមសេចក្តីថ្លែងការណ៍។

នៅក្នុងការធ្វើបច្ចុប្បន្នភាព កាលពីព្រឹកថ្ងៃព្រហស្បតិ៍ អាជ្ញាធរសុខាភិបាលហ្កាហ្សា បាននិយាយថា ការវាយប្រហារតាមអាកាសរបស់អ៊ីស្រាអែល នៅក្នុងដែនដីប៉ាឡេស្ទីន បានសម្លាប់មនុស្ស ៨១នាក់ និងជិត ២០០ នាក់ផ្សេងទៀត បានរងរបួស កាលពីថ្ងៃពុធ។