​អេ​ត្យូ​ពី៖ កាលពី​ថ្ងៃអាទិត្យ​ពលរដ្ឋ​អេ​ត្យូ​ពី​រាប់​ម៉ឺន​នាក់បាន​ប្រមូល​ផ្ដុំ​គ្នា​នៅ​ទីលាន​ចតុរង្គ Meskel Square ក្នុង​រដ្ឋធានី Addis Ababa ដើម្បី​តវ៉ា​ប្រឆាំង​ទៅ​នឹង​ការ​ជ្រៀត​ជ្រែក​ពី​បរទេស និង​សម្ពាធ​ក្នុង​កិច្ចការ​ផ្ទៃក្នុង​របស់​ប្រទេស​នេះ ខណៈ​ពួក​ឧទ្ទាម Tigray ដណ្ដើម​បាន​ទីក្រុង​សំខាន់ៗ ​និង​ឆ្ពោះ​ទៅ​កាន់​រដ្ឋធានី​របស់​ប្រទេស​អេ​ត្យូ​ពី​។

​ថ្លែង​ទៅកាន់​ហ្វូង​មនុស្ស​ដ៏​ច្រើន លោក Adanech Abiebi អភិបាលក្រុង Addis Ababa បាន​សង្កត់​ធ្ងន់​ថា គ្មាន​សម្ពាធ​បរទេស ហើយក៏​គ្មាន​ការវាយប្រហារ​ពី​ក្រុម​ឧទ្ទាម​ណានឹង​ធ្វើ​ឲ្យ​ផ្លាស់ប្ដូរ​បំណង​ប្រាថ្នា​ នៃ​ការអភិវឌ្ឍន៍​ជាតិ​របស់​ប្រជាពលរដ្ឋ​អេ​ត្យូ​ពី​បាន​ដែរ​។ ការ​តវ៉ា​នេះ​មាន​គោលបំណង​សំខាន់​ចង់​បង្ហាញ​ពី​ការ​គាំទ្រ​យ៉ាង​ពេញទំហឹង​ ដល់​ការ​អំពាវនាវ​របស់​ប្រទេស​នេះ​ធ្វើឡើង​ដោយ​រដ្ឋាភិបាល​អេ​ត្យូ​ពី ​ដើម្បី​ការពារ​ប្រទេស​ពី​អ្វី​ដែល​ខ្លួន​ហៅថា​ជា​សត្រូវ​ផ្ទៃក្នុង​ និង​ខាងក្រៅ ជា​ពិសេស​រណសិរ្ស​រំដោះ​ប្រជាជន​ទី​ហ្គ្រេ ​(TPLF) និង​សម្ព័ន្ធមិត្ត​របស់​ខ្លួន​។​

យោង​តាម​លោក Abiebi គោលដៅ​ដាក់​មុខ​នៃ​ការ​ជ្រៀតជ្រែក​របស់​បរ​ទេស​ដែល​នៅតែ​បន្ត និង​សម្ពាធ​ជាច្រើន​ពី​ខាងក្រៅ​មក​លើ​ប្រទេស​អាហ្វ្រិក​ខាងកើត​មួយ​នេះ មាន​គោលបំណង​អូសទាញ​ប្រទេស​អេ​ត្យូ​ពីឲ្យ​ស្ថិត​ក្រោម​ ការ​គ្រប់​គ្រង​របស់​គ្រប់គ្រង​របស់​បរទេស​។ អភិបាលក្រុង​រូប​នេះ​បាន​សង្កត់​ធ្ងន់​ថា ពលរដ្ឋ​អេ​ត្យូ​ពី​នឹង​ពុំ​មាន​មន្ទិល​ចំពោះ​ការ​ជ្រៀតជ្រែក និង​សម្ពាធ​ណាមួយ​ឡើយ ហើយ​ពួកគេ​នឹង​ក្រោកឈរ​រួប​រួម​គ្នា​។ ការ​តវ៉ា​ជា​សាធារណៈ​មាន​ឡើង​ប៉ុន្មាន​ថ្ងៃ​ បន្ទាប់ពី​សភា​តំណាង​ប្រជា​ជា​ជន​អេ​ត្យូ​ពី​ប្រកាស​ដាក់​រដ្ឋ​ក្នុង​គ្រាអាសន្ន​រយៈពេល ​៦​ខែ ស្រប​ពេល​ជម្លោះ​រីក​កាន់តែ​ធំ​នៅ​ក្នុង​តំបន់​ភាគ​ខាងជើង​ប្រទេស​នេះ​៕

អត្ថបទ៖ សុខមាន