បើយោងតាមបុគ្គលដែលដឹងពីផែនការ នាពេលខាងមុខ បានឲ្យដឹងថា ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump គ្រោងនឹងចេញក្រឹត្យមួយ ដែលធ្វើឲ្យរូបិយប័ណ្ណគ្រីបតូក្លាយជាអាទិភាពគោលនយោបាយ និងផ្តល់ឲ្យអ្នកខាងក្នុងឧស្សាហកម្មនេះមានសំឡេង នៅក្នុងរដ្ឋបាលរបស់លោក។

បុគ្គលដែលដឹងពីកិច្ចការនេះ បានប្រាប់ថា ក្រឹត្យនេះត្រូវបានគេរំពឹងថា នឹងដាក់ឈ្មោះគ្រីបតូថា ជាតម្រូវការជាតិ ឬអាទិភាព ជាពាក្យយុទ្ធសាស្រ្តដែលមានបំណងណែនាំភ្នាក់ងាររដ្ឋាភិបាលឲ្យធ្វើការជាមួយឧស្សាហកម្មនេះ។

ដោយសុំនិយាយក្នុងលក្ខខណ្ឌមិនបញ្ចេញឈ្មោះ ដើម្បីពិភាក្សាអំពីក្រឹត្យដែលមិនទាន់បង្ហាញជាសាធារណៈនោះ បុគ្គលនោះបាននិយាយថា ក្រឹត្យនេះក៏គ្រោងនឹងបង្កើតក្រុមប្រឹក្សាប្រឹក្សាគ្រីបតូផងដែរ ដើម្បីតស៊ូមតិ សម្រាប់អាទិភាពគោលនយោបាយរបស់ឧស្សាហកម្មនេះ។

ចំណាត់ការនោះនឹងជាការផ្លាស់ប្តូរដ៏ធំ សម្រាប់គ្រីបតូ ដែលជាគោលដៅសម្រាប់ការស៊ើបអង្កេត ក្នុងអំឡុងរដ្ឋបាលរបស់ប្រធានាធិបតី លោក Joe Biden បន្ទាប់ពីមានករណីក្លែងបន្លំល្បីៗយ៉ាងច្រើន ក្នុងនោះរួមទាំងការក្ស័យធនរបស់ក្រុមហ៊ុនប្ដូររូបិយប័ណ្ណគ្រីបតូ FTX ផងដែរ។

ភ្នាក់ងារសហព័ន្ធ រួមទាំងគណៈកម្មការមូលបត្រ (SEC) ផងដែរ បានដាក់ពាក្យបណ្តឹងជាង ១០០ ប្រឆាំងនឹងវិស័យនេះ ក្នុងរយៈពេលប៉ុន្មានឆ្នាំថ្មីៗនេះ ហើយនិយតករធនាគារ បានធ្វើឲ្យមានការលំបាក សម្រាប់ក្រុមហ៊ុនគ្រីបតូ ក្នុងការធ្វើការជាមួយស្ថាប័នហិរញ្ញវត្ថុ៕